Sha ka UDP leit pynïasoh ki nongkyrshan na ka NPP, INC bad VPP ha Langrin Constituency
Mawkyrwat, Rymphang 10 : Ka jingpynkhreh na ka bynta ka jingïaleh MDC Election jong mynta u snem 2025 ka la nang ïaid shakhmat ha kaba ki kyrtong jong ki seng saiñ pyrthei ruh ki la nang ïai pynkhlaiñ ïa la ki jong ki jong ki nongkyrshan bad ha kaba ka jingïarung ïa mih jong ki nongkyrshan ruh ka la long para ba ïa pyni bor.
Ha kaba ïa dei bad kane ka bynta, na ka liang ka United Democratic Party (UDP) kaba hap hapoh jong ka Langrin Constituency ha kine ki khyndiat sngi ka la ïoh ban pynlong ka jingïalang ha Nongnah ha ryngkat ka jingpdiang ruh ïa ki nongkyrshan kiba dang wan rung thymmai kata na ka National People’s Party (NPP), na ka Indian National Congress (INC) bad kumjuh ruh na ka Voice of the People’s Party (VPP).
Ïa kiba la wan ban pynïasnoh thymmai sha ka UDP, la ïoh ban pdiang sngewbha da u MLA/MDC jong ka Ranikor Constituency, bah Pius Marweiñ ha ka jingïalang paitbah kaba la pynlong ha ïew Mawendeng-Nongnah, South West Khasi Hills District.
U bah Pius Marweiñ kum u kyrtong jong ka UDP na na Langrin District Council Constituency u la ong ba ha kum kine ki sngi ki jingkular ruh kiba bun bad kiba kynthoh ruh kiba long har rukom khamtam ïa u dieng uba bun bha ki soh ha kaba ki briew ruh ki kwah ban kawang. Ym tang kata, u la ong shuh shuh ba hapdeng ka jingiaid lynti jong u, kiba bun ki kynthoh ïa u hynrei u don pat ka jingshaniah ba ki paidbah hi kin sa bishar halor kane bad kam da donkam eh ïa u ba un pynphai ktien ïa kita ki jingshah kynthoh.
Haba kren ha kaba ïa dei bad ki lad pynroi, u la ong ba napoh ka MDC Scheme kam da long kaba heh bad ym lah hi ruh ban kular ïa ki kam pynroi kiba kham heh na kane ka skhim hynrei ka MDC Election ka dei ba kita bynta ba kita kiba shah jied kin leit hapoh District Council ïa kaba ki long shwa man shwa ki la buh bad ai kyrpang ba kin don bad leit hangtei ban ïada ïa ki aiñ, ka khyndew ka shyiap, ka riti ka dustur, ka hok longtrai mantrai, ban ïada ïa ka shongkha shongman, bad kiwei de ki aiñ kiba ktah ïa ka jylla.