Mawkyrwat, Ïaïong 28: Ki nongkyrshan bad ki nongkitkam jong ka United Democratic Party ne UDP kiba ju long ki nongkyrshan bad ai mynsiem ai jingmut ba kordor ha ka jingïaid lynti ha ka kam saiñ hima sima jong u Bah Renikton Lyngdoh, MLA ka Mawkyrwat Constituency, ki la shim ïa ka rai ban leit pynïasoh noh sha ka National People’s Party (NPP).
Ha ka tyllong khubor ba la ïoh lum bad jingsaphriang ka shithi ha ki rynsan social media lah ban ong ba ïa kane ka rai la shim hadien ka jingïamir jingmut lang ha ka General Meeting kaba la long ha ka 16 tarik Ïaïong, 2026 ha Dorbar Hall, Mawkyrwat, ha kaba baroh ki dkhot ki la mynjur lang ban leit rung noh sha ka NPP.
Halor kane, ki Convener ki la pynbna paidbah bad khot lang ïa baroh ki nongkyrshan ba ieid jong u Bah Renikton Lyngdoh, naduh ki samla kynthei bad shynrang, ki longkmie bad longkpa, ha kaba ki la wan ïashimbynta ha ka jingïalang ban rai paidbah ban pynïasoh paidbah noh sha ka party NPP.
Ïa ka jingïalang paidbah ban pdiang ïa ki nongkyrshan ka UDP ban leit ïasoh sha ka NPP ki la buh ban pynlong ha ka 2 tarik u Jymmang, 2026 ha ka por 11 baje mynstep ha Nativity Hall Mawkyrwat, South West Khasi Hills District.
