Sha ka Law Commission phah u Bah Pala ïa ka jingai jingmut halor ka jingktah ka UCC

Shillong, Naitung, 11: U MP na Shillong, Bah Vincent H Pala u la dep ban phah ïa ka jingai jingmut jong u halor ka Uniform Civil Code (UCC) sha ka Law Commission jong ka Ri da kaba banjur ban pynlong ïa ka jingwad kaba bniah halor ki jingktah jong ka UCC lada pyntreikam ha shwa ban shim ïa kano kano ka rai.
Ha ka shithi sha u Member Secretary jong ka Commission, u Bah Pala u la ong, “Nga ngeit ba ka Law Commission jong ka Ri kan bishar bniah ïa ki mat kiba nga la kdew ha ka jingthoh bad nga kyrpad ruh ïa ka Commission ba kan pynsngap ruh ïa ki jingpynsngew kiba wan na ki kynhun bapher bapher bad pynlong ruh ka jingwad bniah kaba janai halor ki jingktah kiba lah ban mih na ka UCC ha shwa ban shim ïa kano kano ka ri.”
U pynpaw ruh ïa ka jingsngewkhia halor ka jingkyrkieh ban pyntreikam ïa katei ka ishu kaba kyllaiñ ha shwa ka elekshon MP kaban sa wan kaban long ha u snem ban wan.
Shuh shuh u la kdew ruh ba ka jingthmu ban pyntreikam ïa ka UCC dei ban pynbeit shwa ïa ki jingïatyngkhuh hapdeng ki ain kiba ktah ïa ka riti dustur bad ka hok longtrai jong ki nongshong shnong da kaba buh hakhmat ïa ka jinglong ïaryngkat dor hapdeng ki kynthei shynrang. Ban ïada ïa ka hok jong ki kynthei, ki riewlum bad ki rit paid.
Da kaba kam ba ka UCC kadei ban burom bad pynneh pynsah ïa ka riti dustur jong ki jaidbynriew bapher bapher kumba la kdew ha ka Article 29 jong ka Riti Synshar jong ka Ri, utei u nongïalam Congress ula ong ruh ba ha ka jaka ban buh thong ban wallam ïa ka jinglong kawei kadei ruh ban buh thong ban pynneh pynsah ïa ka jingbun ki riti dustur ba harukom jong ki nongshong shnong ka Ri kaba long ka bynta kaba kongsan na bynta ka jinglong kawei ka ri.