Shillong, Nailar, 22: Ka Myntri ka tnat Aiñ ka Sorkar Jylla ka Dr. Ampareen Lyngdoh ha ka sngi Baar ka la ïathuh ba ïa ka kyrteng jong ki dkhot ba la thung hapoh ka Expert Committee ban khmih bniah ïa ka Job Reservation Policy shen yn sa phah sha ka Kynhun Myntri ba kan ai jingmynjur.
“Ïa ka kynhun ladep pynkhreh bad shen yn sa shim rai da ka Kynhun Myntri,” ong ka Dr. Ampareen ha ka jingïakren bad ki lad pathai khubor.
Ka la ong ba ka Kynhun Myntri kan sa shim rai khnang ban pynstet ïa ka kam.
Ha ka 1 tarik, Jylliew, ka Sorkar Meghalaya Democratic Alliance (MDA) ba ïalam da u Conrad K Sangma ka la pynbna ban thaw ïa ka Expert Committee ka ban khmih bniah ïa ka Job Reservation Policy jong u snem 1972.
Ïa kane ka rai la shim katkum ka jingai jingmut jong ka Committee ba la khlieh da ka Dr. Ampareen Lyngdoh kaba kynthup ïa baroh ki seng saiñpyrthei hadien ka jingshong shahthngan ba khlem pud sngi da u President jong ka Voice of the People Party (VPP) u Bah Ardent Miller Basaïawmoit.
