Shillong, Rymphang 02 : U Symbud Myntri Rangbah ka jylla, Bah Prestone Tynsong ha ka sngi Thohdieng u la pyntip ba ka bai luksan na ka bynta ka jingshim jaka ban shna ïa ka surok ba 38 Kilometer jong ka Shillong – Western Bypass ka la hiar sha ka 650 klur tyngka hadien ba la leh thymmai biang da kawei.
Haba kren bad ki lad pathai khubor, u Bah Preston u la ïathuh ba ka sorkar ka la bthah ïa baroh ki DC jong ka Ri Bhoi bad ka East Khasi Hills ba kin leh thymmai biang haba ïadei bad ka jingshim jaka hadien ba ka bai luksan ka la poi haduh 1,200 klur tyngka kaba la long jan arshah na ka dor jong ka projek kaba long 600 klur tyngka.
Dei na kane ka daw ba ka sorkar pdeng ka la thmu ban pyndam noh ïa katei ka projek.
U Symbud Myntri Rangbah u la ïathuh ruh ba ki district collector jong ki ar distrik ki la dep ruh ban phah ïa ka dor ba thymmai na ka bynta ka bai jaka.
“Kaba leh thymmai ka bai jaka ka la poi kumba 650 klur tyngka kaba nga sngew ba ka la kham ïahap. Kumta, ngi la lah ban pynhiar ïa ka bai siew bai jaka jan mar shiteng na kaba rim,” u la bynrap biang.
La ïathuh ruh ba ïa katei ka projek la phah leh thymmai hadien ba u Myntri ka sorkar pdeng ba dei peit ïa ka tnad Transport u la bthah haka jingïakynduh dang shen ha Guwahati.
“Ha kane ka jingïalang la sngew lehrain namar ka dor jong ka projek Shillong Western Byepass ka poi kumba 650 klur tyngka katba ka bai shim jaka pat ka la poi sha ka 1200 klur tyngka. Na ka liang u Myntri sorkar pdeng u la bthah dalade ban phah leh thymmai biang lym kumta yn sa duhei ïa ka projek. Kumta mar ïa poi ngi la pynlong bun tylli ki jingïalang bad ki district collector jong ki ar distrik kiba mynta ki la phah pat ïa ka dor ba thymmai na ka bynta ka bai shim jaka,”u la bynrap biang.
Dang ha kane ka sngi Palei ki trai jaka ba hap ha Ri Bhoi distrik kiba kloi ban ai ïa ki jaka jong ki na bynta katei ka surok ki la pynpaw hakhmat ka sorkar ba kin pdiang ïa ka dor sorkar kaba la buh ha u snem 2020 khnang ban ïoh pynurlong ïa ka surok Western Bypass.
Ïa kane ka kynhun la ïalam da ka Synjuk ki Rangbah Shnong Ri Bhoi (SRSRB) ban kynduh ïa u Symbud Myntri Rangbah, Bah Prestone Tynsong.
La ïathuh ruh ba ïa kane ka kam la dep ban pyntip sha ka sorkar Pdeng lyngba ka Ministry of Road Transport hadien ba la dep ban ïoh lut ïa ka jingshim jaka na ki bor distrik jong ka Ri Bhoi bad East Khasi Hills District.
