Sha ka 20 lak tyngka kiew ka DG ïa ki MLA ban ïarap bai kot bai dawai ïa ki paidbah

Shillong, Jymmang 04 : U MLA ka Shillong South, Bah Sanbor Shullai ha ka sngi Saitjaiñ u la ïathuh ba ki MLA ka Meghalaya mynta ki la ïoh 20 lak tyngka ka Discretionary Grants (DG) kaba ka sorkar jylla lyngba ka Assembly Secretarïat ka ju ai sha ki MLA na ka bynta ban ïarap ïa ki paidbah haba ki kynduh ïa ki jingdonkam ba kyrkieh.
“Nga pynpaw ka jingsngewnguh ïa u Lamphang ka Ïing Dorbar u Thomas A Sangma kumjuh ïa u Myntri Rangbah ka Jylla Conrad K Sangma kiba la pynsngew bad mynjur ïa ka jingtyrwa jongnga ha u snem ba la dep ban kyntiew noh ïa ka DG na ka 10 lak sha ka 20lak tyngka,” ong u Bah Sanbor haba kren bad ki lad pathai khubor hadien ba la wai ka jingïalang pynkup burom ïa ki heprit ba mihkhmat ïa ka jylla ha ka ïakob kiew lum.
U Bah Sanbor u la ïathuh ruh man u snem tang shu dei ka por long skul na ka liang ki longïing kiba kham duna ka ïoh ka kot ki ju wan ban pan jingïarap bad kumta dei lyngba ka Discretionary Grants bad da kaba pyndap lang na ka tulop u ju ïoh ban kyrshan lang bun ki longïing ban thied kot bad kumjuh wat ka bai skul jong ki khun nalor ka bai dawai, nangta haba don ba ïap bad kiwei kiwei ki jingïarap ba kyrkieh kiba ki paidbah constituency ki ju wan kyrpad.
“Bun ki longïing kiba ym don shuh u nongkamai bad ki kmie kiba shu bylla katba ïoh, kum kita haba ki wan shanga ban pynsngew ba ki duna 4,000 tyngka ne 5000 tyngka ka bai skul ne bai kot, ngi ai beit da ka form na ka Discretionary Grants. Bad ïa kito ki form pat ki hap ban pynshisha na ki principal jong ki skul,” u la ong.
Nangta u ong ruh ba hadien ba la dep ban pynshisha kin sa pyllait pat ïa ka pisa. U Bah Sanbor u la ïathuh ruh ba na bynta kito ki longïing kiba don khun iwei, lyngba ka DG u ïarap 3,000 tyngka, kiba don arngut ki ïoh 4,000 tyngka bad kiba don pat lai ngut shaneng ki ai 5,000 tyngka.
“Ïa kane ruh nga la dep sam lut. Dang shen ha ka por ba mih ka result Matrik hangto ruh ki wan shanga namar tang ka bai klas ba ki hap siew nyngkong (first installment) ka poi 6,000 -7,000 bad lada kim siew ïa kata kim ïoh ban leit klas. Kumta haba nga ïohi ba ki dei hok ban ïoh nga ai. Ki nongshong shnong ha constituency jongnga kim dei ban khuslai namar kane ka 20 lak kadei ka jongphi hynrei ki la shu ai lyngba u MLA ban jied ban sam sha kiba dei hok ban ïoh,” u la ong.
Shuh shuh u Bah Sanbor u la ïathuh ba ïa kane ka 20 lak ba ki ïoh na ka DG u la dep ban sam lut. U ïathuh ruh ba ka jingpynlut kam dei tang 20 lak hynrei ula dep ban pynlut haduh 27 lak da kaba sei tam 7 lak tyngka kaba dei na ka tulop.
Katkum ka jingïathuh jong u Bah Sanbor, man u snem ki hap ban phah ïa ka Utilization Certificate sha ka Assembly Certificate ban pyni ba kumno ki pynlut ïa kane ka 20 lak tyngka ryngkat ki jingpynshisha. U ong ruh ba lada ym phah bad pynbiang ïa ka UC kan shem jingeh ïa ki ban ïoh biang pat ïa ka ha u snem ban wan.