Nongpoh, Jymmang 19: Kum uwei naki samla ba don ka jingkitkhlieh naka bynta ban dang pynïar ïaka shlem ai jinghikai Computer sha ki khun samla khamtam ha kane ka juk ba mynta ba pyndonkam da ki kor Computer, u Samla Saiñkupar Syngkli u ba dei u Managing Director ka El Elyon Institute kawei naki shlem ai jinghikai Computer ha Ri-Bhoi bad kiwei kiwei ki tnad hikai u la pynïar ïaka shnat treikam jong katei ka jaka hikai sa sha ka thaiñ Ri-Bhoi Sepngi bala buh haka shnong Wahsyn-on Jirang.
Ïa katei ka jaka ai jinghikai kaba la tip kum ka El Elyon Institute la plie paidbah ahaka sngi Balang da u Bah Sosthenes Sohtun MLA ka Jirang kum u kongsan haka jingdonlang u Bah Victor Ranee MDC, Paiem RH Wahlang Syiem ka Hima Jirang bad kiwei kiwei.
Ka jingthmu jong u Samla Saiñkupar Syngkli ban seng ïa katei ka shnat treikam jong ka EL Elyon Institute ka long ban pynjan ïaki khun samla khamtam sha ki thaiñ nongkyndong ba kin ioh ka jinghikai ha kaba ïadei bad ka kor Komputer ha kane ka juk stad kaba mynta kaba bun naki kam ki jam la leh beit lyngba ki kor computer ban pynsted ïaka jingtreikam bad pynduna ïaka jingbam ka por da ka jingangnud ruh ban pynduna ïaka jingktah ha kaba ïadei bad ka jinglut jingsep bad ki samla kim donkam shuh ban leit sha ki jaka ba jngai kaba long ka jingkyrkhu kaba khraw.
Katei ka shlem hikai ka dei ruh kaba la saiñdur da u Samla Saiñkupar Syngkli ba kin ioh ki lad jingpule katkum ka juk technology ba mynta bad ki samla ki dei ban nang ban pyndonkam computer haba ki leit ban wad ïa kino kino ki kam bad ka dei ruh ka kor kaba ai jinghikai shibun ïaki khun samla lyngba ka kor internet.
Naka liang u Bah Sosthenes Sohtun MLA ka Jirang haba kren ha katei ka sngi u la ai ka jingïaroh kaba khraw ïa u Samla Saiñkupar Syngkli wat haka rta kaba dang kham khynnah pynban u dei u samla u ba iohi jngai ïaka lawei jong ki para samla ba ki donkam ban nang bad ban don ka jingpule ha kaba ïadei bad ka computer bad kane kan pynsuk ïaki samla pule sha ka thaiñ Jirang bad ïaki kmie ki kpa kumjuh ba kim donkam shuh ban phah pule sha ki jaka ba jngai lyngba ka jingplie ïa katei ka jaka ai jinghikai ha katei ka thaiñ.
Ha katei ka sngi naka liang u MLA u la aiti ruh 2 tylli kor Komputer kum ka jingïarap ïa katei ka jaka ai jinghikai ba kin dang bteng ban ai ka jingshakri sha ki khun samla.
