Shillong, Jylliew 14: U Para jong u Bah Cheristerfield Thangkhiew u Bah Granarysterfield Thang-khiew u la leit ban ujor sha ïing kashari High Court of Meghalaya halor ka jingbym leh eiei ka sorkar halor ka ejahar kaba ki la ujor ha Mawlai Police Station ha kaba ïadei bad ka jingshah shiat ïap u Bah Che ha ki pulit ka sorkar jylla ha ka 13 tarik Nailar 2021 ha ïingsah jong u ha Mawlai Kyntonmassar.
Ïa kane ka motduma la shim bishar da u Justice HS Thangkhiew bad ha ka hukum la kdew ba kane ka jingujor da u Bah Granary ka dei halor ka jingbym ïohi jingtip eiei shuh jong u halor ki sienjam kiba ka sorkar ka shim ha kaba ïadei bad ka ejahar kaba u la ujor ha Mawlai Police Staion ha ka 18 tarik Nailar 2021 bad kumjuh ruh ïa ki sienjam kiba ka sorkar ka shim ha kaba ïadei bad ka kaiphot tohkit ba thung da ka sorkar ban tohkit halor ka jingshah siat ïap u Bah Cheristerfield.
Na ka liang u muktiar ba mih khmat ïa ka sorkar jylla u la pyntip ba ka sorkar ka la shim ïa ki sienjam pyrshah ïa ki pulit kiba donkti ban siat ïa u Bah Che.
“Ha kaba ïadei bad ki pulit kiba donkti, ka jingtohkit bad ki lynti ba dei ban pynshitom ïa ki ka dang ïaid kat haduh mynta,” u la pyntip.
Shuh shuh na ka liang ka sorkar lyngba u muktiar jong ka ka la pan por ban aiti ïa ka status report la kumno kumno saw taiew bad na ka liang ka kashari ruh ka la ai lad ïa kane.
Ka kashari kan sa shim bishar biang ïa kane ha ka 13 tarik Naitung 2023.
Haba u Mawphor u ïakren bad u Bah Granarysterfield Thangkhiew u la ïathuh ba ka daw hi ba kum ka ïing ki shim ïa kane ka sienjam ka dei hadien ba ka sorkar kam shym la leh eiei wat hadien ba ka Judicial Commission ka la aiti ïa ka kaiphot bad ka kdew shai mano ba don kti ban siat ïap ïa u Bah Che.
“Ngi la leit ban kynduh bad ki heh pulit bad ki heh sorkar hynrei la shu pynshad shrieh ïa ngi bad bad ka jingleit ujor hi ka dei beit ban pynthikna ba u hymmen jong nga u dei ban ïoh ïa ka hok jong u,” u la ong.
Haba kylli ïa ka daw ba u la leit ban ujor kat haduh mynta u bah Bah Granarysterfield Thangkhiew u la ong, “baroh shi katto ngi ai lad ïa ka sorkar ba kan leh eiei hynrei kam leh eiei bad ngam banse ban shim noh da kane ka sienjam,” u la ong.
