Shillong, Risaw 13: Ka Meghalaya ka la pynliem ïa ka Nagaland da 5 wiket bad pynsah sa shi over ha ka jingïalehkai jong ka plate group ka lympung Senior Women’s T20 Trophy ha Agartala kaba la long ha kane ka Lah Sngi U Blei (13 Risaw, 2025).
Ban pynkynmaw, ki lai tylli ki jingïalehkai ba nyngkong jong ka Meghalaya ki la shah pynsangeh noh namar ka jinglong jingman ka suiñbneng kaba sniew kaba khlem ailad ïa ki jingïalehkai ban ïaid shakhmat hynrei ki la buh ïa kane shadien ban khur ïa ka jingjop.
Hadien ba jop ïa ka jingkynting pisa (toss) ka Meghalaya ka la aiti ïa ka Nagaland ba kan tied nyngkong. Ka Nagaland ka la tied pyndep ïa ka 20 ober ba la mang hynrei ïohlad ban kamai tang 74 ron bad hap noh 7 wiket.
Ka Solina Jaba ka la long kaba seisoh tam ha ka boling, da kaba khur 3/14 naki 4 ober ba ka la ïoh bynta. Ka Rubi Chetri (1/10 in 3) bad ka Debasmita Dutta (1/13 in 4) ki long kiwei pat ki nongïalehkai kiba la khur wiket na ka bynta ka Meghalaya, katba ka Najmeen Khatun kadei ka nongtied kaba kongsan tam jong ka Nagaland da kaba kamai 19 ron.
Haba beh ïa ka thong ka Meghalaya ka la duh noh dang kloi ïa ar wiket hynrei da ka jingïalehkai bha jong ka Debasmita, kaba la noh synñiang 31 ron naki 47 tylli ki bol kynthup ïa lai tylli ki saw ron (four), ka jingkyrmen jong ka kynhun ka la sdang ban skhem. Ka Suriti Kumari Ray ka la kamai 18 ron na ka 30 (2x4s) bad ryngkat lang kine ki arngut ki la noh synñiang 44 na ka bynta ka wiket kaba lai.
Nangta ka jingnoh synñiang jong ka Rubi kaba la kamai 16 ron na ki 21 tylli ki bol ka la ïalam ïa ka Meghalaya sha ka jingjop bad ka Debasmita ka la shah jied kum ka nongïalehkai ba tbit tam lane ‘Player of the Match’ jong kane ka jingïakhun.
Ka jingïalehkai kaba wan jong ka Meghalaya kan long pyrshah ïa ka Mizoram ha ka sngi Balang.
