Nongpoh, Risaw 28: Ka jingnang ka jingstad ka dei ka atiar ha kane ka juk kaba mynta, ka jingdon ïaka jingbah khlieh da ki nongïalam shnong ban kyntiew ïaka jingnang jingtip naka bynta ki khun samla kynthei bad shynrang jong ka shnong kan kyntiew arted ruh ïa ka shnong baroh kawei, bad dei da ka katei ka jingangnud ban kyntiew ïa ki khun samla ki nongïalam shnong jong ka shnong Nartap ki la plie syndon ïa ka jaka kynshew kot ne ka Community Library jong ka shnong ba ki khun samla kin ioh ban pynlut por ban pule ïa ki kot bapher bapher ban pynïar ïaka jingnang ka jingtip.
Ïa katei ka jaka kynshew kot la pynbit pynbiang daka shnong Nartap lyngba ka jingïarap ki 3 tylli ki kynhun trei mon sngewbha kata ka MOSONiE Socio-Economic Foundation, ka Piramal Foundation bad ka Goonj Foundation bad ha ryngkat ka jingaiti met bad mynsiem da ki nongshong shnong ban pynlum pynlang ïaki kot kiba donkam na la ki jong ki ïing.
Ïa katei ka Library la plie paidbah noh ïa ka da u Roman Ningthoujam na ka Goonj Foundation kum u kongsan haka jingïadon lang u Bah C. Shabong Gram Savak Mawsyntai Circle kum u Symbud kongsan, ka Ringbila Pungding na MOSONiE Socio-Economic Foundation, u Purvesh Yadav na Piramal Foundation, u Bah Silvestar Makri Rangbah Shnong Nartap, Bah Albest Syngkli, Bah Stefort Dkhar, bah Ïoanis Kurbah ki dkhot jong ka Dorbar shnong, ki longkmie longkpa lem bad kiwei kiwei.
Ha katei ka sngi naka liang ki nongmihkhmat jong kitei ki 3 tylli ki kynhun trei mon sngewbha ki la sam sngewbha ruh sha ki khynnah skul da ki tiar ba kin ïoh pyndonkam ha ka jingpule jong ki.
Na ka liang u Roman Ningthoujam kum u kongsan haba kren ha katei ka sngi u la ai ka jingïaroh ïaka shnong Nartap kaba la lah ban pynbit pynbiang ïa katei ka library ba ki samla pule jong katei ka shnong ki ioh ban pynlut por ban pule kot haka jaka ba kin pynlut por haki kam kai.
U la ong ruh ba kane jingnang jingstad ha kane ka juk ba mynta ka long ka atiar ba ki khun samla kim dei ban kheiñ sting hynrei ban shimkhia ban minot thop haki jingpule bad haka por ba ki lait ki lah ruh ban peit ïa kiwei kiwei ki jait kot kiba lah ban pynïar ïaka pyrkhat ka pyrdaiñ bad kumjuh ruh ka jingnang ka jingtip.
