Shillong, Nailar, 10: Ha ka sngi rakhe kyrpang jong ki riewlum ka NESFAS ka la plie paidbah ïa ka ‘Mei Ramew State Agroecology Co-operative Society’ ha ka sngi Thohhdieng da ka jingsakhi lang jong u Deputy Registrar ka Cooperative Society ka Sorkar Jylla u Bah R.Rymbai uba la long kum u kongsan ha kane ka sngi.
Ka jingpynbna ïa ka jingseng ïa ka Cooperative Society ka kynthup na ki 19 tylli ki kynhun jong ki Primary Cooperatives na ki 19 tylli ki shnong. Ka Society ka la pynkhreh na bynta ki kynhun jong ka Primary Cooperatives ban ai jinghikai halor ki mat treikam bapher bapher katkum ka jingdonkam jong ka Co-operatives.
Kum shibynta jong ka mat treikam ka Co-operative la ïasnohkti lang bad ka SIRD bad BRDC.
Hadien ka jingplie pyrda jong ka Cooperative Society, la pyn bud sa ka iew jong ki nongrep haka ba kine ki primary cooperatives jong ka society ki lah pyn i nam ïa ki mar rep bad bam tynrai jong ki. Ka iew jong ki Nongrep ka dei ka kam ba ju pyntyllun na ka por sha ka por ba lah pynïaid da ka seng NESFAS na bynta ki nongrep na kylleng ka jaka.
Ha ka sngi, ka NESFAS ka la pynlong ruh ïa ka iew jong ki nongrep ban pyni nam bad ban die ïa ki mar rep ryngkat ka jingshet tynrai da ki kynhun na ki shnong kiba ju don bynta bad ka NESFAS.
U Bah R. Rymbai haba kren kum u Kongsan u la ong, ba kane ka jingplie ïa ka Co-operative Society ka dei kaba kyrpang ba ka don ka jingïadei kaba khraw bad ka rep ka riang bad ka bam ka dih tynrai.
U la ai khublei ïa ka jingkiew stet ha ka liang ka kam bad u la ïaiban ruh halor ka jingsdang kaba shit rhem jong ka society bad sam ïa kane ka jingkyrmen ba ka lah ban nang ïar ha ryngkat ka jingïatreilang jong iwei pa iwei i shnong ha ki snem ban wan.
U Chairperson jong ka Mei Ramew State Agroecology Co-operative Society u Bah Shaiphar Dohling haba ai ïa ka jingkren lamphang u la ong, “la seng kyrpang ïa kane ka Society ban kyntiew ïa ka ïoh ka kot bad ban pynbha shuh shuh ïa ka jingïadei bad ki para shnong ha ki por ki ban dang wan bad ban trei na bynta ban pynbha ïa ka mei mariang.”
Hadien kane u Bah Nestar Kharmawphlang u la ïathuh ba kane ka Society ka thmu ban kyrshan ïa ka ïoh ka kot ha ki shnong da kaba ai ïa ki jinghikai bapher bapher bad ban pynshlur bad ai mynsiem ïa ki nongshong shnong ban shim da ki rukom rep ba pynneh pynsah ïa ka mariang bad kiwei de ki jait kam.
“Ka Mei Ramew State Agroecology Co-operative Society ka thmu ban wanrah ïa ka jingkylla ba skhem da kaba kyrshan bad kyntiew ïa ki riewlum. Ka NESFAS ka buh ïa ka jingmut Mei Ramew kaba mut ba ka mei mariang bad kane ka dei ka jingkular jong ka NESFAS da kaba buh ïa ka thong ban burom bad ïada ïa ka mei ramew,” la ong u Bah Nestar.
U Director jong NESFAS u Bah Pius Ranee, u la pyntip shaphang ka projek ba la pyntyllun da ka NESFAS kaba ïadei bad ka jinglum jingtip lyngba ka TAPE kumba la pynbit pynbiang da ka FAO-UN.
“Ka jingmih halor jong ka jingwad jingtip lyngba ka TAPE Study ka pyni bad ai jingmut ba ka dor jong ka jingïasam jingtip bad ka jingshimkhia ba la pynsuhthied ha ka liang ka synshar ka khadar kan ïarap ïa ka pyrthei hi baroh kawei ban ïaleh pyrshah ïa ki jingeh halor ka spah mariang bad ka imlang sahlang kaba sdang ban don ha kine ki por ba mynta. Ngi kum ka NESFAS ngi la trei shitom da ka jingkyrmen ba kane kan long ka nuksa sha kiwei pat ki shnong,” la bynrap u Bah Pius.
I Kong Bisikrin Marweiñ, kaba dei ka dkhot jong ka Cooperative Society ka la ong, “ka jingthmu jong ngi lyngba kane ka Society ka long ba ngin ym pynsep ei bad ba ngin wad ïa ki lad ki lynti ban ïoh jinghikai bapher bapher. Lyngba kane ka jingsdang kaba rit, ngi kwah ba ngin nang kiew shuh shuh shakhmat.”
