Seisoh ka jingshong kyllaiñ myngngor ha Jantar Mantar khot ïakren ka MHA ia ka HANM

Shillong, Naiwieng 05: Ka Hynniewtrep Achik National Movement (HANM) kan leit ban ïakynduh ïa ki heh ophisar jong ka Ministry of Home Affairs (MHA) ha ka sngi Balang ban buddien halor ki 3 tylli ki mat jingdawa jong ka seng.
Haba ïakren bad u President ka HANM Bah Lamphrang Kharbani ula ong, ba ki heh ophisar ki la khot ïakren ïa ki nongïalam ka HANM hadien ba ki la dep ban pynlong ïa ka jingïakhih da kaba shong kyllaiñ myngngor ha Jantar Mantar, Delhi haka 3 tarik u Naiwieng.
“Ma nga ryngkat bad 5 ngut ki nongïalam ka seng ngin leit ban ïakynduh ïa ki heh jong ka MHA ha ka sngi Balang ne Sngi Palei bad ngin leit ban ïakren halor ka jingdawa ban pyntreikam ïa ka Inner Line Permit(ILP) ha Meghalaya, ban pynrung noh ïa ka ktien Khasi bad Garo ha ka khyrnit kaba phra jong ka riti synshar ka ri bad ban pynbeit noh ïa u pud u sam hapdeng ha jylla Assam bad Meghalaya” ula ong.
Ula ïathuh ba ki nongïalam ka seng ki la shah khot ïakren ha ki heh ka MHA hadien ba ki la dep ban pynlong ïa ka jingïakhih ha nongbah Delhi.
Kum ban shu pynkynmaw, ha ka 3 tarik u Naiwieng ka HANM kala pynlong ïaka jingïakhih ha Jantar Mantar ha kaba palat spah ngut ki dkhot ki la ïashim bynta ha kane ka jingïakhih ha kaba la wan ban ai jingkyrshan da ki nongïalam jong ka Jaintia National Council bad ki 2 ngut ki MDC ka KHADC kiba kynthup ïa u Bah Bajop Pyngrope bad u Bah Sherbor Mawlong.