Seisoh ka jingleit pyni, kdew lynti bad batai ka Sonam bad 3 ngut kiba pynïap ïa u Raja; ong u SP

Shillong, Jylliew, 17: Sa ka wait kaba ar kaba la pyndonkam ha kaba dkhat jubor ïa ka jingim jong u nongkhaïi heh spah na Indore u Raja Raghuvanshi la lap na jaka jngohkai Mot Arliang hajan kshaid Wei Sawdong, ka jaka ba lalap ïa ka met ïap ba la lam pyut jong u, ha ka jingpynwadur jong ki Pulit ïa ka jingtohkit ïa ka kam runar ha ka sngi Baar.
Ïa ka Sonam Raghuvanshi ryngkat bad lai ngut ki paralok jong u samla jong ka u Raj Singh Kushwaha, u Akash Rajput, Vishal Singh Chauhan bad u Anand Kurmi kiba donkti ha ka jingpynïap ïa u kurim jong ka la ïalam sha Sohra ban pynwandur biang kumno ki pynïap ia u Raja Raghuvanshi ha ka sngi ba hynñiew ba ki dang don ha along ki Pulit.
Ha ka jingïakren bad ki lad pathai khubor ha Sohra, u Superintendent of Police ka East Khasi Hills Bah Vivek Syiem u la ong, “Baroh kawei ka jingpynwandur, ka jingkdew, jingpyni ïa ka jingshah pynïap, ïa ka kam runar la phah pyni biang mynta ka sngi bad ka la long kaba seisoh bha. Ngi la ïoh ïa ka dur kaba shai bad ngi la buh rekod ha ka Video bad ngi la don ruh ïa ki nongsakhi ba laitluid ban lum ïa ka bad ka jingpynwandur ka la long kaba jop.”
U la ong ba ka Special Investigation Team (SIT) ka la pynlong ïa kane ka jingpynwandur biang ïa ka kam runar ha ki san tylli ki jaka da kaba sdang shwa na ka shnong Mawlakhiat bad shaduh Parking Lot jaka peitkai Motarliang hajan Wei Sawdong.
“Kane ka jingpynwandur ka la long katkum ka jingtohkit kaba ngi la pynlong ha kine ki khyndiat sngi ba la dep (ha kaba) ki nongleh kam bymman ki la kubur ba ki la leh ïa ka kam runar,” u la bynrap.
Haba phah pyni biang ïa ka kam runar, u SP u la ong, “Ngi la sdang na ka jaka ïeng kali ha Mawlakhiat ha kaba ki la buh ïa ki Scooty bad nangta ngi la ïaid sha kawei ka jaka kaba jngai 3-4 kilomitar na ka jaka ïeng kali ha Mot Arliang hajan Wei Sawdong, ha kaba ki la sangeh ban shondur bad ka la don ka jingpyrshang ha kata ka jaka ban pyniap ïa u Raja hynrei kam shym la urlong namarba u Raja u la sdang ban start ïa ka bike jong u bad ki la hap ban ïaid noh. Ki la sangeh 200 mitar na ka jaka ïeng kali Mot Arliang hajan Wei Sawdong, hangne ki shu shondur bad kim shym la pyrshang ban pynïap ha kane ka jaka.”
“Ha kaba kut ngi la poi ha ka jaka ieng kali ha Mot Arliang, Wei Sawdong, ngi la pynthikna shano la buh ïa ki Scooty bad ka jaka jong ki Scooty ba ki la pynïeng hajan ki jaka ïeng kali bad kumno ki rung ban poi sha ka View Point ha Mot Arliang. Hadien kata ngi la leit sha ka View Point ha Mot Arliang bad ngi la pynthikna shano ka liang u Raja u ïeng,” la ong u Bah Syiem.
U la bynrap, “Ban pynwandur biang ïa ka jingjia, ngi la phah ïa uwei na ki Pulit ka Fire and Emergency Service ban shim ïa ka bynta jong u Raja. Ngi la lah ban pynthikna ha kano ka rukom u ïeng shwa ba un shah pynïap, mano ba ïeng hangno bad kumno ka jingtangon ka la sdang. Lai tylli ki jingtangon ki la jia, u Vishal u dei uba mait nyngkong da ka wait ïa u Raja, bud sa u Anand uba ar bad uba khatduh u dei u Akash. Mar ia shah mait u Raja u la lyniar bad ha kum katei ka por ka Sonam ka la phet na ka jakaba ka ïeng shadien jong kine ki lai ngut katba kine ki lai ngut ki dang rah ban bret ïa ka met jongu shapoh riat. Arngut ki rah na ka met bad uwei na kjat bad ki sa bret ïa u shapoh riat Mot Arliang”
U SP u la pyntip ba ka wait kaba ar la lap na riat Motarliang tang hadien kumba shi kynta ei ei ba kine ki lai ngut ki la phla ba ki la bret ar tylli ki wait shapoh riat. Kane ka wait ba lap mynta ka sngi ka dei kaba don ka jingbat da ka nar. Kane ka la paw pyrthei ha ka jingtohkit ïa ki nongleh kam bymman, ki ban shah set phra sngi ha along ki Pulit.
“Ki la pyni biang kumno ba ki bret ïa ki ar tylli ki wait. ïa ka wait ba nyngkong ba ki la bret ngi la ïoh tam, ka dei kaba don ïa u jingbat rong soh. Ka wait kaba ar ka dei kaba don da u jingbat nar,” u la ong haba pyntip ba ka kynhun SDRF ka la hap ban pyndonkam da u Metal Detector ban lap ïa ka wait kaba ar ba la pyndonkam ha kane ka jingpynïap briew.
Shuh shuh, u Bah Syiem u la ong ba ka SIT ka la pynthikna ba kumno ka sopti rong lieh jong u Akash, ïa kaba la ïoh tam na ka jaka ba la lap ïa ka met jong u Raja ha ka 2 tarik Jylliew, hadien ba u la pyni kumno u la bret ïa ka sopti.
“Ngi la lah ban pynthikna halor kaei kaba la jia ïa ka mobile phone jong u Raja, ha kaba nyngkong la pynjot da ka Sonam bad hadien da u Vishal. Kine ki dei ki jingjia baroh kiba ngi la hap ban pynwandur tad haduh ba kin da mih ruh na kane ka jaka,” la bynrap shuh shuh u SP.
Hadien kane la leit ban pyni bad pynwandur kumno la bret ïa ka jainjri ba phong ka Sonam hajan Mawkma. Nangta kumno la pynïeng ïa ka Scooty harud surok ha Mawmihthied.
U SP u la pynskhem ba ki Pulit ki la shimkhia bha ban pynngat kyndon ïa kane ka kam runar katkum ki jingjia ba la lum sakhi sabut.