Sei madan ka HYC ïa ka jyrsieh thied tin sopïing ka tnat Directorate of Housing ka sorkar jylla

Shillong Jylliew 20: Ka HYC Central Body lyngba u President u Bah Roy Kupar Synrem ka la lap ba ka la don ka jyrsieh kaba khraw bha ha kaba iadei bad ka jingthied ia ki tin sopiing da ka sorkar lyngba ka tnat kaba dei peit bad kumta halor kane ka seng ka la dawa ïa ka sorkar ba kadei ban phah pynphai noh ïa ki “Corrugated Aluminium Roofing Sheet” ne ki tin sopiing ba la aiti sha ki C&RD Block ha ka jylla.
Haba iakynduh bad ki lad pathai khubor u President ka seng u Bah Roy Kupar Synrem u la ong ba ka seng ka la phah ia ka dorkhas sha u Myntri Rangbah ka jylla u Conrad Sangma, u Symbud Myntri Rangbah u Bah Prestone Tynsong bad sha u Myntri ka tnat Housing u Marcuise N Marak ha kaba ka la ïathuh ba ka la ïohpdiang ïa ki jingkhñium halor ki jinglong jingman jong kine ki ‘Aluminium Roofing Sheets” ba la sam sha ki C&RD Block bad ba la dep ruh bna sap sha ki katto katne kiba ïoh myntoi ha Khasi-Jaiñtia Hills.
“Ngi la leit ban tohkit halor kane bad la leit jngoh ruh ïa ki katto katne ki C&RD Block ban pynshisha bad ha kine ki jingleit ngi la lap ïa ka jinglong pohdor bad ka jingbym bha jong kine ki tin sopiing ba la thied da ka Directorate of Housing, Meghalaya, Shillong bad ba la sam da ka Supplier ba la tip kum ka ‘Hariana Iron Works Pvt. Ltd, Kolkata, West Bengal’, kaba um ju khaïi ne shna ne sam ïa ki tin sop ïing ne roofing sheet kumba la pynpaw hapoh ka profile jong ka kompeni,” ong u Bah Roy.
U la ong ba katkum ka jingtip ka seng, ka Directorate of Housing ka la buh ïa ka order bad kawei ka kompeni ban sam ïa ki Corrugated Aluminium Roofing Sheet ha AA3105H18 Alloy jong ka 8 Feet ka jingjrong (Length), 800MM ka jingïar (Width) bad 0.45MM ka jingrben kumba ju leh.
“Ka jingrben kaba 0.45MM kadei kaba biang na ka bynta ki tin ba bha haba la sam sha kiba ïoh myntoi, hynrei ha ka jingtohkit ka seng bad ki jingujor ba la ïohpdiang ka jingrben ki tin ba la sam da katei ka kompeni ka long tang kumba 0.25MM bad kadei kaba pohdor bad kam long ruh kaba bit ban shna sem ki jingri,” ong ka HYC.
Namar kata ka seng ka dawa badei ban pynphai ïa ki tin ba la sam da ka ‘Hariana Iron Works Pvt. Ltd, Kolkata, West Bengal’ sha kiba bun ki C&RD Block ha ka jylla bad dei ban pynsangeh noh mardor ïa ka jingsam ïa ki.
Namar kane ka kam ka kynthup ïa ka jingpynlut ka pisa paidbah, kumta dei ban pynlong ka jingtohkit, dei ban shimkam pyrshah ïa Director, Directorate of Housing, Government of Meghalaya, Shillong kiba dei ki nongthied (Buyer) bad kino kino ki ophisar kiba donkti halor kane, bad ïa ka kompeni ‘Hariana Iron Works Pvt. Ltd, Kolkata, West Bengal’ dei ban buh dak ïong ïa kino kino ki kam hadien habud bad ka sorkar jylla, dei ban shimkam pyrshah ïa ki Block Development Officer (s) ne kino kino ki ophisar hapoh ki C&RD Block ba ki la pdiang ïa kane ka kam ban sam ïa ki tin bad kiwei kiwei.
“Lada kam don kano kano ka jingshimkhia ba mardor kan pynbor ïa ka seng ban shim da kiwei ki lad ki lynti halor kane ka jingpyndonkam bakla ïa ka pisa u paidbah,” ong u President ka HYC Sengkmie u Bah Roy Kupar Synrem.