Pyllait u Myntri Rangbah ïa ka bhah khajna ba 30 klur tyngka sha ka JHADC

Shillong, Jylliew 20 : Ka sorkar jylla ka la pyllait 30 klur tyngka ka pisa kaba dei ka bhah khajna na u dewiong jongka Jaintia Hills Autonomous District Council (JHADC). Ka sorkar ka la pyllait ïa kane ka pisa hadien ba ki dkhot ka Executive Committee bad ki dkhot ka District Executive Committee jongka NPP ki la leit ïa kynduh bad kyrpad ïa u Myntri Rangbah u Conrad K Sangma ha ka 6 tarik mynta u bnai na ka bynta ban ïarap pyllait ïa ka bhah khajna ka JHADC khnang ba ka Council kan ïoh ban siew tulop ïa ki nongtrei shwa ka lehniam Behdeinkhlam.
U Chief Executive Member (CEM) ka JHADC u ma Thombor Shiwat u la ïathuh mynta ka sngi Palei ba ka sorkar ka la dep ban pyllait ïa katei ka bhah ba ka Council ka dei ban ïoh. Tangba ha kajuh ka por u la ïathuh ba ka bhah khajna ba ka JHADC ka dang dei ban ïoh ka long sa 50 klur tyngka na u dewiong bad 9.91 klur na u mawshun bad kiwei kiwei ki mar poh khyndew.
Halor kane u Myntri Rangbah ula kular ban shim khia ban pyllait ïa katei ka pisa kaba sah ïathuh u ma Thombor. Na ka liang u CEM bad ka Executive Committee jongu ki la pynpaw ka jingsngewnguh ïa u Myntri Rangbah ka jylla uba la shim khia ban ïarap ïa ka JHADEC ban ïoh ïa kane ka bhah khajna namar lyngba kane ka la ïoh ban pyllait ïa ka tulop jong ki nongtrei jongka.
Kane ka jingshim khia jong u Myntri Rangbah u Conrad K Sangma ban pyllait ïa kane ka pisa ka pynpaw ba u dei da shisha u nongïalam uba bat la ka kular kumba u la khlei, ong u ma Thombor. Nalor kane u la pynpaw ruh ka jingkyrmen skhem ba ka sorkar MDA-2 hapoh ka jingïalam jong u Conrad kan shim khia ban pyllait ïa ka bhah man la u bnai khnang ban ym thut ban pynïaid ïa ki kam ka Council.