Sdien phasi u rangbah ba suba thombor ïa ka khynnah skul ha Lawbyrtun

Mairang, Nailur 26: Ki paidbah jong ka Shnong Lawbyrtun, mynta ka sngi ki la lap ïa kamet jong u Bah Kmenwell Marweiñ, u rangbah uba la suba jur ba udei uba la thombor ïa ka khynnah skul ha kane ka taïew baladep.
La lap ïa kamet jong u da kiba haïing ha ka por ba ki dang leit sha Pynthor ban leut peit ïa jingrep jong ki. Ka hymmen jong une u rangbah, ka la ïathuh ba ki la leit sha katei ka Pynthor namar baroh shi taïew kim shym la leit sha katei ka pynthor naduh ba la jah u para jong ka na ïing. Hynrei hamar ba ki por ha katei ka jaka, ka la wan beh ka jingsma iwtung bad ynda ki la poi hajan ki la lap ïa ka met ïap bad na ki jaiñ ki nep ki la ithuh ba dei u para jong ka, ha kaba ka met la thiah ha ka nala um. La suba ba u Bah Kmenwell u la sdien phasi ïalade da u jyrmi ha u dieng bad i mat ka met ka la hap ha madan.
Hadien kane ki la pyntip sha ki nongïalam Shnong bad ki nongïalam Shnong pat ki la pyntip sha ki Pulit jong ka Mairang.
Na ka liang ki Pulit kiba la wan sha katei jaka ba lap ïa ka met, ki la lap ba ym long shuh ban rah ïa ka met sha Hospital ban leh ïa ka Post Mortem. Kumta Ki Doktor ki la pyndep noh ïa ka Post Mortem ha katei hi ka jaka ryngkat ka jingïadon lang ki Magistrate bad ki Pulit.
Katkum ka khubor ba la ïoh lum, la ïathuh ba na ka liang jong ka Shnong bad ki Pulit ki la sunba jur ïa u Bah Kmenwell uba la thombor ïa kane ka khynnah dei namar ka jingïoh tam ïa ka tupia jong u na ka jaka ba u la thombor ïa ka khynnah. Hadien kane ki la pynshisha na kiba haïing ïa ka tupia bad la lap ba kadei shisha ka jong u.
Naduh katei ka sngi, ki Pulit ki la pynlong ka jingthwet, hynrei kim shym la lap satia ïa u tad haduh ban da lap syndon ïa ka met ïap jong u. La suba ruh ba une u rangbah imat u la sdien phasi hi naduh katei ka sngi ba u thombor ïa kane ka khynnah kaba la mih na Lawbyrtun ba leit skul sha Mawkyllei.