Sdien phasi u doktor kabiraj ba ha byndi ki pulit, kynnoh leh beijot ia ka khynnah samla

Tura, Nailar 19 : Uwei u briew uba dei u doktor kabiraj bad uba la shah kynnoh leh beijot ïa kawei ka Khynnah, ula dkhat jubor ïa la ka jingim da kaba sdien phasi ïalade hapoh byndi ki pulit ha Williamnagar Police Station ha ka miet Sngi Thohdieng.
Une u briew ba 50 snem ka rta, uba la pyniap ïalade, u dei uba ju kam kum uba tbit bha ban sumar kynbat dawai hynrei ula shim kabu pat ïa ki khynnah kynthei kiba wan phah sumar ha u.
Une u briew u kyrteng u Jitman Sangma ba na shnong Rongsak kaba hap hapoh Chiading Police Station. ïa une u briew la kem ha ka 17 tarik Nailar hadien ka jingujor jong ki bahaïing jong kawei ka Khynnah.
Haba wan sumar ki nongpang, une u briew ula ju bthah ïa ki bahaïing hasem ba kin ieh ïa u bad ïa ki nongpang ha kawei ka kamra halor ka nongrim ba un pynkyllan ïa ki dawai kynbat bad umphiang ïa ka met jongki. Ha kane ka rukom, u ju shim kabu ïa ki nongpang.
Ki Kmie Kpa kane ka khynnah ki la leit ujor sha ki Pulit halor kane ka kam jong u bad ki Pulit ruh ki la kem noh ia u bad kit sha Williamnagar Police Station ha ka sngi Palei ban pynlong ïa ka jingtohkit.
Hynrei ha ka miet sngi Thohdieng, sa kawei ka khynnah ka la wan shakhmat ban ujor ejahar pyrshah ïa une u briew da kaba kynnoh ba ula leh beijot ïa ka.
“Ula don hapoh ka along bad ha ka por kumba 9:30 baje mynmiet, u nongap pahara ula leit jngoh ïa u bad shem pynban ba ula sdien phasi” ong u Siddarth Ambedkar, Superintendent of Police ka East Garo Hills.