Nongpoh, Lber 30 : Ban sngap syndon na ka sur u paidbah sha ki shnong ki thaw ban tip halor ki jingeh bad ki jingdonkam na ka sorkar, u Deputy Commissioner ka Ri Bhoi lyngba ka prokram kyrpang ba la tip kum ka ‘Community Interaction Program” u la plie paidbah da kaba sdang ban pynntreikam na Jirang C&RD Block ha Ri Bhoi District.
Ïa kane ka prokram la lam khmat da u Deputy Commissioner u Abhilash Baranwal, ha kaba la pynlong ïa kane ka prokram ha ka 27 tarik u Lber 2025 ha Jirang C&RD Block ban pynurlong ïa ka thong kane ka prokram ban pynsuk ïa ki paidbah ban pynpaw ïa ki jingdonkam ne ki jingeh ba ki don ha ki shnong ki thaw.
Ha kane ka sngi, nalor ka jingdon u Deputy Commissioner la don ryngkat ruh u Block Development Officer ka Jirang C&RD Block, u P. Hajong, ki ophisar na ki tnad sorkar, ki rangbah shnong bad ki nongïalam shnong na ki shnong bapher bapher ka Jirang C&RD Block ba hap ha ka Patharkhmah Civil Sub Division ha Ri Bhoi.
Kawei na ka mat ioh jingmyntoi ki paidbah ba la ïa kren ha kane ka sngi, ka dei ka CM Connects ba la pynshai sha kitei ki nongïalam shnong ba ki shim ïa ki lad ki lynti ban ioh jingïarap khnang ban poi ki kam pynroi sha ki shnong ki thaw.
Ki mat ba hakhmat eh ba la ïa kren ruh ha kane ka sngi ki kynthup naduh ka kam ri jingri, ki surok, ka Mobile Network, ka bording ilektrik, ki jingeh ha khappud, ka umbam ka umdih na ka skhim JJM, ki skul, ka koit ka khiah bad kiwei kiwei de.
Ha kane ka sngi, ki nongïalam shnong ki la pynpaw ruh ban don noh ka ophis treikam ki Village Organization, ka jingdonkam ïa ki lynti ïaid kjat ne ki jingkieng ïaid kjat ha kiba bun ki shnong ba donkam bad ruh ban don noh ka ophis treikam ka Fire and Emergency Services Station ha Jirang, ha kaba u Deputy Commissioner u la kular ban shim khia ïa kitei ki mat sha ka sorkar.
Na ka liang u Deputy Commissioner ka Ri Bhoi, u Abhilash Baranwal, u la ong ba ka bor synshar District kan pyntreikam thikna ïa kane ka prokram ban ioh jingmyntoi ki paidbah ha kaba pyntip ïa ki jingeh sha ka sorkar lyngba ka ophis u BDO bad ka ophis jong u bad ruh la buh kyrpang ïaka Helpline da kaba kin phone ha u number 813181191 khnang ba kin lah ban pynpoi ïa ki jingthoh ne ki jingujor sha ka ophis jong u bad sha ka ophis u BDO ban ioh pat ban pynpaw sha ka sorkar. u Baranwal u la pynpaw ruh ba kane ka prokram dang bteng ha kylleng ki ophis treikam ka Blcok ha Ri Bhoi bad kum u DC ruh un sa leit ban iuh kjat na ka bynta ban sngap ïa ka sur ki paidbah.
