Nongstoiñ, Lber 30 : Hadien ba la jah jar shipor ban sangeh treikam kata haduh 13 snem, ka All Lyngngam Organizaton (ALO) kaba dei kawei na ki seng treimon sngewbha kaba la rim bha na ka thaiñ ha Ri Lyngngam, ka la khie im biang mynta u snem 2025, ha kaba kane ka seng myn ha ka sngi saitjaiñ jong ka taïew, ka la ïoh ban pynthymmai noh ïa ki nongkitkam na ka bynta ka samoi treikam jong u snem 2025-2028.
Ha katei ka sngi kaba dei ruh ka 29 Lber 2025, ka seng ka la ïoh ruh ban pyntian smai ïa ki nongkitkam ba thymmai da u bah Kwirinus Mawsor uwei na ki Nongseng nyngkong ïa katei ka seng ALO.
La seng ïa katei ka seng ha u snem 1986 da ki katto katne ki samla ka thaiñ Ri Lyngngam, kiba kynthup ïa u Benjamine Mawsor ba la bam kwai ha ïing u Blei, u Lidrikshon Shyrkon, u Coneleos Nongbri, u Kenedy Hashah bad u Kwirinus Mawsor bad kiwei kiwei bad mynta kane ka seng ka la kynjoh sha ki 40 snem.
Ka jingthmu jong katei ka seng na ka bynta ka Ri Lyngngam ka long ban wanrah ïa ka jinglong shipara hapoh ka Ri Lyngngam, ban kyntiew ïa ka pule puthi ha kaba ka seng ALO ka la dep ruh ban seng kawei ka skul ha Nongkulang. Khamtam eh ka seng ka buh ïa ka thong ban pynneh pynsah ïa ki riti ki dustur u Lyngngam, kumjuh ruh ban pynneh pynsah ïa ka rukom bat khyndew ki Lyngngam bad kiwei kiwei.
Ïa katei ka jingïalang la pynlong ha Vani Hall Pyndengrei Nongstoiñ bad la ïadonlang ruh shibun ki kynrem ki lyndang jong ka thaiñ Ri Lyngngam, kiba kynthup naduh u bah Pius Marweiñ MLA/MDC ka Ranikor, u bah Methodios Dkhar MLA ka Mawshynrut kiba la long ruh kum u kongsan bad u symbud kongsan ha katei ka sngi. La synranlang ruh da u bah Srally Rashir MDC ka Mawshynrut, bah Nondi Diengngan MDC barim ka Nongstoiñ, bah G. Rynñiaw MDC barim ka Mawshynrut, ki ophisar ki doctor, ki phadar ki pastor bad kiwei kiwei.
Ki nongkitkam ba thymmai na ka bynta ka samoi treikam jong u snem 2025-2028, ki kynthup ïa u Dr. Bostick Mawsor kum u Lamphang jong ka Seng ALO, u samla Bendrowell Hashah kum u pyndap phang ka ALO, u samla Ioanis Hahshah, u samla Selestine Diengngan bad kiwei kiwei de kiba la kot haduh 18 ngut.
Ha katei ka sngi la pynphuh pynphieng shuh shuh da ki juradiang, ki jingrwai, jingshad ba la pyndonkam ruh tang da ka ktien tynrai bad la pynkut da ka jingai khusnam ia ki ‘riew pawkhmat jong ka Ri Lyngngam, ïa kaba la tip ruh kum ka Khusnam Kynmaw Tympang 2025.
Ki nongïoh ïa ki khusnam ki kynthup naduh u (L) Risen Mawsor MLA, MDC ba nyngkong napdeng ki Lyngngam, kiwei kiwei ki MLA/MDC barim ka thaiñ kumjuh ruh bad ki phadar, ki pastor, ki Sister, ki Officer bad kiwei kiwei kiba la pyndep ïa ki kyrdan pule bapher bapher.
U bah Pius haba ai jingkren kum u kongsan u la ïaroh shibun ïa ka jingïohi jngai jong ki samla ban pynkhie im biang ïa katei ka seng. U la ong ruh ba ki Lyngngam ha kane ka juk kim dei shuh kiba dang sahdien ha ki liang baroh. Kum u kongsan haba u ïohi ïa ki khun samla jong ka thaiñ kiba la shad bad rwai tang da ki ktien lajong, ka la pynkyndit ïa u bad u la ong jin lada ki Lyngngam ki dang sahdien mynta ka sngi u la dei ban ïohi ba ki samla ki ïa shad ha ki jingrwai hindi.
Kane hi ka pynshisha ba ki Lyngngam kim dei shuh kiba dang sahdien, lada ïakren kum ki ophisar, ki doctor, ki phadar, ki pastor, ki nongmihkhmat bad kiwei kiwei lah don lut bad u sngew sarong. Haba ïakren ïa ka ban pynneh pynsah ïa ki riti ki dustur, hap ruh ban kynmaw ban ym klet ka rukom shongkha shongman, balei ba la klet noh ban pynneh pynsah ïa ka shongkha shongman haduh ba ka la kylla ka shongkha jaktung ka rukom ïa shongkha.
Kata ka dei ka dawbah kaban pyntroiñ ïa ka jaidbynriew u Lyngngam haba ka shongkha ka long lyngkrang, khamtam eh haba ïapoi kha bad ki bym dei ki lyngngam ne Khasi, shaei kan poi kata ka pynneh pynsah ïa ki riti dustur, ong utei u kongsan.
