Shillong, K’Lyngkot 14 : Ka jingbun palat ki nongkloh pla ha ki khyndiat snem ba la dep ha kylleng ki basa ha Iewduh ka la pyntieng ïa kiba bun ki nongleit ïew ban leit sha ki basa ba kham khapngiah.
Hynrei katkum ka jingïathuh da ki nongshong ïew kane ka jingkloh pla ka la sdang thanda mynta khamtam hadien ba ka Hima Mylliem ka la pynjur ïa ki bor pahara kylleng kylleng.
Lah ruh ban kdew hangne ba u CEM ka KHADC Bah Pyniaid Sing Syiem ryngkat u Syiem ka Hima Mylliem bad ki Myntri ki la hiar ban jurip khnang kylleng ki basa hadien ba ka la don ka jingud jingnam na ki paidbah halor ka jingbun palat ki nongtuh.
Halor kane, na ka liang ki nongshong ïew da kaba pynpaw ba mynta watla ka jingdon ki nongtuh hynrei ki kwah pat ba ka Hima Mylliem ka dei ban pynbiang ki pulit ïew ha manla ki lad.
“Lada ka Hima Mylliem ka lah ban pynbun ki pulit ïew khlem pep ki nongkloh pla kin ym shlur than ban kloh pla,” ong i longkmie ba die markhutia ha ïew.
Katkum ka jingïathuh jong i, ki nongtuh ha ïew ki dei kiba shalak bha bad teng teng ym ju ïohi kumno ki tuh hynrei la shu ïohsngew ba hylla ki briew ba la shah tuh.
Haba ïoh ban ïa kren bad uwei pat u rangbah ha basa jaiñ u la ong ba ha kitei ki basa ki kham duna ki nongtuh ban wan ym kum ha kiwei ki basa ba kham khapngiah.
Na ka liang ki nongshong ïew ha basa jhur, basa sohsaw bad ruh ha ha khlieh ïew ki kyntu ïa ka Hima Mylliem khamtam ïa ka KHADC ba ka dei ban pynstet ban buh khambun ki CCTV khnang ba ki nongshong ïew nongwan ïew kin shngaiñ.
“Ka jingdon ki CCTV kan ïarap ban ïohi dur ïa kito ki nongkloh pla bad kane kan pynsuk pat ban thwet bad kem ïa ki,” ong kiba bun ki nongshong ïew.
Ki la kyntu ruh ïa ka Hima ba lada ka tuklar ban wanrah ka jingkylluid ha ki lynti ïaid briew kane ruh ka la dei shi bynta ban khanglad ïa ki nongtuh ban ïoh kabu.
“Tangba khatduh lada leh kumno kumno ruh ka shong hi ha ka jingphikir ki nongwan ïew ban thep bha ïa ki tiar ba ki wan thied bad khamtam eh ïa ka pisa,” ki la ong.
Dang shen na ka liang ka Executive Member ba peit ïa ka tnad Iew Kong Grace Kharpuri ka la dep ban pynpaw ba ka Council ryngkat ka Hima kin trei borbah ym tang ban pynlong ïa ka Iewduh kaba khuid ba suba hynrei ruh kaba shngaiñ na ka bynta ki nongwan ïew bad kumjuh ïa ki nongshong ïew.
