Sdang shongshit ka jingpyllait skim ha kiba bun ki constituency

0

Ka elekshon mynta ka la sdang ban shongshit bha namar jan baroh ki MLA ki la sdang ban khohreh leit sam skim ha ki constituency jong ki kaba long ruh shi bynta ban kynduh biang ïa ki nongkyrshan jong ki ha ki shnong ki thaw bad ki polling station bapher bapher. Kane kadei ruh ka lad ïa ki nongmihkhmat ba kin ïoh ban pynshai paidbah kaei kaba ki leh ha kine ki saw snem shiteng bad kaei kaba ki dang thrang ban leh ha ki san snem ban wan lada ki paidbah ki jied biang ïa ki. Dei ruh ha kum kane ka por ba ki kyrtong kiba thmu ban aireng na ki constituency bapher bapher ki pyrshang ban leit pyni dur khmat ryngkat ki song jingïarap khamtam eh lyngba ki lympung ïalehkai phutbol lane da kaba pynshna ïa ki lynti ïaid kjat, ïarap pynmaramot, ïarap ïa kiba pang ba shitom lane kiba duk ba kyrduh bad bun kiwei kiwei. Da kaba leh kumne, ki paidbah ki sdang ban ïa nujor ïa ki kam kaba trei u MLA u MLA ha ki saw snem tam bad ki kam ba utei u kyrtong ba thmu wan aireng u pyni. Ka shong ruh ha ka jingnang jong kito ki kyrtong ban pynshai sha ki paidbah bad lada ki nang lei lei sa ban kren, khlem artatien kin ïoh beit ïa ka jingkyrshan u paidbah.
Dei lyngba ka jingtbit jong ki kyrtong ba thymmai ba bun ki MLA kiba la jop bunsien ruh ki dang khyllem bad shah rem. Kane ka la jia bun tylli ki constituency bad kam dei tang ki MLA kiba mad ïa ka jingshah rem hynrei wat kito kiba la don ha ka shuki Myntri Sorkar ruh ki ju ngat lang ha kum katei ka apot. Khlem artatien, ka elekshon kaban wan ha kine ki hynriew bnai ei ei, ka dei ruh ka por ba ki paidbah nongthep vote kin phai dien aiu ki la ïoh na u nongmihkhmat jong ki ha kine ki khyndiat snem ba la dep bad kawei kaba ki la wanrah ha ki shnong ki thaw jong ki ha kine ki snem baroh. Dei ruh ha kum kane ka por ba ki nongthep vote ki pynap shibun ki jingkylli na bynta u MLA ha shwa ba kin leit biang ban jied ïa u MLA uba thymmai ha u 2023. Ha kum kane ka samoi ki paidbah ki ïoh ban pyrkhat bad bishar bniah namar bun kiwei pat ki kyrtong kin wan ban pynshai ne ban kular ha khmat jong ki ïa ka thong kaba ki kwah ban trei lada ki jop kum u MLA jong ki.
Bunsien hi ka jingrem noh jong ki MLA tang hadien shi samoi ba ki jop kadei namar ka jingkular jong ki bad ka kam kaba ki trei kam ïahap satia. Don ruh ki MLA kiba la mad noh ïa ka jingshah rem tang namar ba ynda ki la jop ki la kiar wat ban kynduh ïa ki nongthep vote khamtam eh ïa ki nongkyrshan la jong. Ka daw kaba hakhmat kaba ju long ka daw rem ïa ki kadei ba kaei kaba ki kular ha shwa ka elekshon kam ïahap wat tang shi pawa na kaba ki pyndep.
Ka saiñpyrthei hi ha Meghalaya ka pher bha bad la ju ïohi ruh ba man ka san snem kumba 20 haduh 30 ngut ki MLA ki ju shah rem bad mih bujli da kiba thymmai. Katkum ka jingïohi kane ka lah ban dei ruh na ka rukom sam ne pynpoi ïa ki skim kam pynroi sha ki shnong ki thaw ne ki iing ki sem. Ki nongïalam jong ki unit bapher bapher kim dei satia ban shaniah tylli tang ha iwei ne ar tylli ki nongïalam hynrei ban da don ki briew kiba peit pyrman man la ki unit khnang ba ki kam pynroi kin ym poi tang ha ki bahaiing jong ki nongkitkam jong ki unit. Kane ka ju jia beit ha man la ki constituency bad kane hi kadei ka daw kaba hakhmat eh kaba u MLA um ju tip ei ei ïa kaei kaba ki nongkitkam ki leh hynrei ha kaba khatduh dei ma u ba mad ïa ka jingshah rem.

Leave A Reply

Your email address will not be published.