Sa tang khyndiat bnai eh ba ka jylla kan sa sakhi ïa ka jingjied ïa ki nongmihkhmat ba thymmai sha ka Iing Dorbar Thawain ka jylla kaba long la kumno kumno ha u Rymphang ne Lber jong u snem ban wan bad kane lehse kadei ka dawbah kaba pynlong ïa kiba bun ki nongïalam khamtam ki kyrtong na ki party bapher bapher ban sdang ïa ka jingkynthoh wat hapdeng ki party ba ki treilang ha ka sorkar jylla.
Kumba long mynta hi, ka ban kham itynnad ka jingïakynthoh kan dei hapdeng ka National People’s Party bad ka United Democratic Party kiba dei ki party heh kiba thaw ïa ka sorkar synrop jong ka Meghalaya Democratic Alliance (MDA). Ka jingmih jong ka Trinamool Congress ha ka jylla ruh ka la pynshongshit bha khamtam eh da ka jingmih jong uwei na ki MP na West Bengal ban kren ïa ka jingdonkam ban ithuh bad pynrung noh ïa ka Ktien Khasi bad Garo ha ka Khyrnit kaba Phra jong ka Riti Synshar jong ka Ri.
Ym lah ban len ba ka ju dei ka rukom ha Meghalaya ba ki sengsaiñpyrthei watla ki treilang ha kajuh ka sorkar hynrei tang shu poi shisnem ne arsnem shwa ka elekshon ki la sdang pat ban beiñ ban khoh para ma ki. Kane kam jïa tang ha shwa ka elekshon MLA hynrei wat ha ka elekshon MDC ruh ka ïaid kumjuh hi.
Mynta ka kynti ruh khlem artatien ka mat kaba kham khluit hi kan dei beit ka jingtyngkhuh hapdeng ka NPP bad ka BJP hadien ka jingshah kem jong u State Vice President jong ka, u Bernard Marak hadien ba ki pulit ha ka jingkhynra ïa ka farmhouse jong u, ki la lap shibun kiei kiei ki bym sngewtynnad. Na ka liang ka BJP Meghalaya ruh la ïohi ba kumno ka leit ban ujor syndon sha u Lat ka Jylla u Satya Pal Malik ban dawa ba dei ban pynkynriah noh ïa u SP bad DC jong ka Tura. Ka daw kaba pynlong ïa ki ban dawa kadei halor ka jingkynnoh ba ki don ki nongtrei party kiba shah pyndik haba ïadei bad ka ishu jong u Bernard.
Watla mynta la ïoh ba ka lyer jong ka NPP bad UDP ka sdang ban beh bha hynrei ym lah pat ban ong mano ban kham ïoh jingmyntoi na katei ka jingïakynthih na kawei ka party sha kawei pat. Kaba kham ima ka long ba watla ka lyer jong ka jingkwah ban ïatylli lang ki party riewlum ka jur bha hynrei katei ka kyntien ïa tylli lang kawei kan ym jia lano lano ruh ha Meghalaya namar da lei lei ka UDP kan ym leit ban ïa trei lang bad ka NPP ha ka elekshon ha u 2023 lane ka NPP kan leit sha ka UDP watla kin don ki MLA na kitei ki party kiban kylliang uniphom khyndiat bnai shwa ka elekshon.
