Nongstoiñ, Nailar 04: Ha kawei ka jingjia kaba la jia hynnin ka miet ha ka por 10 baje ei ei, kawei ka trok kit dieng kaba don ïa u number ML 06 3286, ka la noh sha rïat ka jaka kaba don ha ka shnong Umlieh harud ka surok bah Nongstoiñ Shillong.
Ha kane ka jingjia, lai ngut ki ki briew ba kynthup ïa u Phasding Hujon 38 snem u ba dei u nongñiah ïa ka kali na Mawsiehum, nangta u Bleding Hujon 40 snem na Mawsiehum bad u Tesding Rynthathiang 38 snem na Mawblei, ki la mynsaw jur ha kane ka jingjia jong ka jingkylla ka trok kti dieng.
Hynrei, ki heh pulit na Eastern West Khasi Hills District, ki la ïathuh ba u nongñiah jong katei ka trok, u la kham shitom jur bad u la khlad noh ha ka por 2 baje ei ei mynstep ha Civil Hospital Mairang.
Halor kane ka jingjia, na ka liang kiba haïing hasem jong u ba la khlad, ki la kyrpad ban nym leh shuh ïa ka Post mortem, ha kaba u District Majistor u la shah bad la aiti sha kiba haïing ïa ka met jong u ba la khlad noh. Katba na ka liang ki pulit ki la register ïa ka mokotduma halor kane ka jingjia.
