Nongstoiñ, Risaw 10: Ha kine ki snem ba la dep ki kam khaïi droks, ka tuh ka thiem bad kiwei kiwei ki la sdang ban jyllei bha ha West Khasi Hsils District khamtam eh ha sor Nongstoiñ. Hynrei, naduh ba ki pulit jong ka Anti Narcotic Task Force ha ryngkat ka jingïatreilang bad ki nongïalam bad ki dkhot jong ka Village Defence Party Committee Nongstoiñ Area, kitei ki kam sniew ki la sdang duna bha.
Ki katto katne ki rangbah shnong ka thaiñ Nongstoiñ ki bym kwah ban pynpaw kyrteng ïalade haba ïakren bad u nongthoh khubor, ki la ong ba ha ki snem ba la dep ki nongkhaïi bad nongdih drok ha Nongstoiñ ki la bun bha bad wat mynsngi mynshai ruh kim salia shuh ban leh ïa kitei ki kam sniew.
Nalor kata ki la ong ruh ba hapoh ïew Nongstoiñ lei lei la jan man la ka miet, ka jingshah pied ïa ki dukan ki jia bad bynrap ruh ba na Nongstoiñ ki nongkhaïi drok ki ïoh lad ban pynsaphriang ïa utei u jingdih basniew shaduh ki nongkyndong.
Ki la ong ruh ba kim lah khlem da ai jingïaroh ïa ki pulit jong ka ANTF, ki nongïalam jong ka VDPCNA, ki nongïalam bad ki dkhot jong ka HYC kiba la trei shitom ban khynra bad an buddien ban kem ïa ki nongkhaïi bad ki nongdih drok man la ka por.
Haba kylli pat la hato don jingkyrmen ne em ba yn lah ban rat dyngkhong ïa ki kam sniew ha Nongstoiñ, ki la pynpaw ba ka long kaba eh ban pynduh khoit ïa ki. Hynrei lada ki kynhun pahara shnong bad ki pulit kin ym shong thait, kin ïai trei shitom suki suki ki nang jah nang jah tangba ym dei pat ban kheiñ sting.
Ha kaba ïadei bad ki nongkhaïi drok pat ki la ong ba ha kine ki bnai ba la dep, la ïohi lyngba ki ladpathai khubor ba ki pulit ka South Garo Hills ki la ïoh ban kem ïa ki nongkhaïi drok kiba dei ki bar jylla. Kumta, lada u drok u la ïoh rung ha Garo hills kam don jingeh ba kin pynpoi haduh Nongstoiñ, namar ba ka surok bah National Highway 44(E) Shillong-Tura ka dei ka surok kaba lait lan bha.
Ha kajuh ka por ki la ong ba ki nongkhaïi drok ki dei kiba na Assam lei lei ki suk bha ban rung lyngba ka surok Dudhnoi-Rongjeng, namar watla ka don ka Anti Infiltration Check point ha Dainadubi ruh.pynban lada ki nongleit nongwan ki don ïa ki jingpynshisha kiba biang kam don jingeh ba kin ïoh ban rung sha Meghalaya bad na Rongjeng pat sha Shahlang ter ter.
Kawei pat ka jaka rung kaba ki briew na Assam ki ïoh lad bha ka dei na ka surok Boko-Langpih-Mawsikar namar ym don khyrdop talasi hangno hangno ruh.
