Shillong, Risaw, 10: U Symbud Myntri Rangbah uba khmih ïa ka tnad Sor Bah Sniawbhalang Dhar u la pynpaw ba ka jingpynkynriah ïa ki nongdie madan sha kiwei pat ki jaka ka dang ïaid shakhmat, ha kaba ka Sorkar ka dang trei ban wad ïa ki jaka kiba biang.
Ha ka jingïakren ha ki lad pathai khubor ha ka sngi Thohdieng u Bah Dhar u la ong ba ka jingpynkynriah ïa ki nongdie madan na ki jaka ba kyrpang kum ha Laitumkhrah, GS Road, bad kiwei yn sa leh noh shen hynrei kan kham shim por katto katne.
“Kan kham shim por namar ngam lah ban bret ïa ki briew lajong ha surok. Nga hap ban wad jaka na ka bynta jong ki ruh ban kynriah ïa ki sha ka jaka kaba dei bad baroh kan long kaba bha,” u la pynthikna da kaba bynrap ba ka Sorkar ka dang trei ban wad ïa ki lad ki lynti kiba biang.
Haba kylli halor ka mat ba la wanrah da ki nongdie madan ha ka thaiñ Khyndai Lad, u Bah Dhar u la ban jur ba ka jingai ïa ki Certificate of Vending (CoV) kan long kaba pyrkhing bha katkum ki kot ki sla kiba shisha.
“Ka jingpynmih ïa ka CoV ka dei ban long kaba shongnia. Kata ka dei ka kyndon na ka bynta jong ka,” u la ong da kaba bynrap ba ki ophisar ki pynlong ïa ki jingïalang manla ka por ban wanrah ïa ka jingsngewthuh bad ban pynshlur ïa ki briew ban pynbiang ïa ki kot ki sla kiba dei.
U Symbud Myntri Rangbah u la pynpaw ka jingsngewnguh ïa ki paidbah ka jylla kiba la ai ka jingïatreilang bad ka Sorkar halor kane ka bynta da kaba kubur ba ka dei ka kam kaba eh.
“Kane ka kam, kam long kaba suk, hynrei nga ai khublei ïa ki paidbah ka jylla kiba la ïatreilang bad ngi,” u la ong.
