Shillong, Jylliew 15: Ka jingsiang ïa ki interlocking tiles ha Police Bazar ka la kylla long ka daw mynta jong ka jingshah peitkhmat ha kiba bun kiba ïaid lynti manla ka Sngi namar kine ki tile mynta lah bun kiba la julor bad mih ruh shabar na ka lynti bad jaka ba la siang ïa ki bad kane ka lynti mynta la ïohi ba ka la kyllang pynban kum ka nala ha kaba ka um la ïoh ban tuid kat naba lait ki jaka.
Mynta khamtam ha kine ki por ba jur bha u slap kane ka lynti ïaid kjat ha khyndai lad kiba bun ki jaka ki la sdang ruh ban lang um bad kane ka la buh ka jingkylli kaba khraw bha ïa ka rukom shna bad buh ïa kine ki tiles ha kane ka lynti.
Kawei ruh na ki daw lehse ka lah ban dei na ka jingshah ka Sorkar ban ïaid kali na kane ka jaka, kaba ha ki por mynshwa kadei beit tang ka lynti ïaid kjat bad ka jaka ïadie ïathied ne ka Commercial Street area hynrei mynta pat lah katto katne snem ka la kylla long pynban kum ka jaka ïadie ïathied ha kajuh ka por bad kumjuh ruh kum ka surok ïaid ki kali.
Kane ka jingshah ka Sorkar ban ïaid kali na kane ka lynti ïaid kjat ha kajuh ka por ka buh ruh ka jingma ïa ki paidbah kiba ju ïaid da ki spah ngut manla ka Sngi.
Lah ban pynkymaw ba ka Sorkar jylla ka la sdang ïa kane ka projek ban pynitynnad ïa ka khyndai lad ne ka ‘Khyndailad Beautification project’ katto katne snem ba la leit ban ailad ïa baroh kawei ka lynti ban siang noh da ki interlocking tiles ha ka jinglut kaba la kot sha ka T.1.6 klur. Hynrei mynta kine ki tiles ki la sdang ban sniew dur.
Lah ruh ban ong ba ka Sorkar jylla Meghalaya ka la pynbna ban pyntreikam ïa kane ka project ha u snem 2011-2012, ha kaba ka la shim pat sa katto katne tylli ki snem ban pyntreikam ïa ka.
Hynrei lah pat ban ïohi ba kine ki jingsiang ïa ki tiles kim lah satia wat tang 5 ne 6 snem eiei ba kin neh ha kaba kane la sakhi ïa ki jingsdang ban julor jong kine ki tiles kiba la siang ha Khyndailad.
