Shillong, Naiwieng 03: Katba nangmih ki sngi la ïohi ba ka jylla ka la nangmih ki briew bym lah ban ithuh ki dei kiba wan naei bad kiba trei ha ki kam kiba kumno.
Ha kine ki sngi la ïohi ba bun na ki jaka bad kiba ïaid lynti ha nongbah Shillong ki la dap da ki nongkhrong ki bym lah ban ithuh satia kidei kiba wan naei.
Haba ïakren bad ka jingai laisen ïa ki kam khaïi, ne ki kam die jingdie ne ki kam khrong ne bylla baroh ki hap hapoh ka jingpeit jong ka tnat Labour hynrei ha kaba ïadei pat kane ka bynta mano ban shim ka jingkitkhlieh naba ka sorkar jylla ka kam ba dei ma ka ka bor ka ban ai laisen ïa ki bar jylla bad ym dei ka KHADC.
Ha kaba ïadei bad kane kumno ki paidbah kin sngewthuh mynta ha kaba ïadei bad ka jingroi, jingkiew bad jingsan jong ki bar jylla kiba la sdang ban kharoi ha kane ka jylla haduh kine ki sngi.
La donkam ïa ki bor kiba dei peit ban shim khia bha halor kane ka jingma kaba lah ban mih na ka daw jong ka jingkharoi jong ki bar jylla kiba wan ban wan sha kane ka jylla da kaba shim ïa ka kam ban shukhrong ne kiwei pat ki jaitkam, naba kane kan wanrah ka jingma ïa ka jylla hi baroh kawei.
La ïohi ruh ba ha kine ki sngi la don ki bar jylla ki ym ithuh ithaw shuh ki wan na ei kiba la shu wanrah ïa la ki jong ki khun ki kti ban pynshong khrong lang ha kano kano ka jaka kaba ïaid paidbah ha kane ka nongbah Shillong.
