Nongpoh, Jylliew 10: Ban plie lad plie lynti ïa ki khun samla ka Ri Bhoi District ban shim kabu ban pyntbit ïa lade ha ka ban aireng ha ki eksamin thungkam bapher bapher, ka ophis u Deputy Commissioner ka Ri Bhoi mynta ka sngi ka la plie paidbah ïa kane ka prokram ai jinghikai ha Patarim Umsning ba hap ha ka Umsning C&RD Block ha Ri Bhoi District.
Kane ka prokram ka dei shi bynta na ka ka Chief Minister’s Career Guidance and Counselling Scheme, kaba dei ka skhim kyrpang ban hikai pyntbit ïa ki samla, ha kaba la pynlong da ka ophis u Deputy Commisioner ka Ri Bhoi ryngkat ka jingïatrei lang ki MLA bad ka Triumphant Institute Of Management Of Education (TIME), Shillong-Guwahati.
Haba plie ïa kane ka prokram ai jinghikai ïa ki samla la don ryngkat naduh u MLA ka Umsning u Cr. Celestine Lyngdoh, u MLA ka Mawhati Constituency u Bah Charles Marngar, u ADC ka Ri Bhoi u Raja Brahma, u BDO ka Umsning C&RD Block, u Bah Andrew Marthong, u Soumen Das, Director T.I.M.E Shillong Guwahati, u Bah K. Warjri, Rangbah Shnong ka Patarim, ki riew rangbah bad ki samla kiba la shim bynta ha kane ka prokram kyrpang.
Haba ai jingkren ruh ha kane ka sngi naduh u Dr. Celestine Lyngdoh, u Bah Charles Marngar kum ki nongmihkhmat bad ruh u ADC u Raja Brahma, ki la ai mynsiem ïa ki samla ka Ri Bhoi ba ki dei ban shim kabu haba don kum kine ki jaid prokram, ka daw ba ka sorkar ka la buh ïa kane ka prokram ai jinghikai lyngba ka Chief Minister’s Career Guidance and Counselling Scheme ka long ban pyntbit ïa ki samla ba ki dei tip ïa ki lad ki lynti haba ki ïa khun ïa kino kino ki exam ne ki kam kiba lah ban ai jingmyntoi ha ka lawei jong ka jingim jongki.
Ki la kyntu ruh ïa ki samla ba kane ka jingmang ka sorkar ban buh kum kane ka prokram kam dei tang kaba shu pynlut ïa ka por bad ka don la ka jingthmu ban kyntiew ïa ki samla ba ki dei ban don ïa kata ka mynsiem ïaleh ha ka jingim bad ka jingwan ai jinghikai ki briew kiba la shemphang bad kiba la tip kham bha kan long ka lad ïa ki ba kin tip kumno ban poi sha ka thong jong ka jingim.
