Nongpoh, Naiwieng 14: Kum kawei na ka thong ban iada kyrpang ia ki sim kbeit ba la khot ha ka ktien Nongwei ki Amur Falcon bad ruh ba kyntiew ïa ka thaiñ Kum kawei na ka jaka jongohkai pyrrhei, ka Tyrso Valley Wildlife Protection Society mynta ka sngi ka plie pyrsa noh ia katei ka Tamasa ba ar sngi ba la pynlong ha Madan Tyrso ha Ri Bhoi District.
Ha kaba pynlong ïa kane ka Tamasa la ïa trei lang da ka Seng Samla Shnong Tyrso Pyllun bad la kyrshan ruh da ka Farmer Producer Cooperative Society.
Ïa kane ka Tamasa la wan plie paidbah da u Bah A.L Hek, uba dei u Myntri sorkar ba dei peit ïa ka tnad Veterinary and Animal Husbandry kum u kongsan bad u Bah Ransom Sutnga kum u symbut kongsan.
La sakhi lang ruh ha kane ka sngi da ki riew rangbah kiba kyrshan ïa kane ka Society ba kynthup ïa u Bah Lumlang Mawnai, u Bah Pateng Myrsing, u Bah Alos Nongpoh, Secretary ka Society bad kynthup kiwei kiwei ki Riew rangbah.
Kum ban pynkynmaw, kine ki sim Amur Falcon ki dei ki siem kiba wan naduh Siberia na South Africa shisien shisnem shuwa ka por ban ot ia u kba bad shipor ha katei ka jaka ba ki la wan sah bad kin sa leit phai biang sha katei ka ri hadien ba la dep ban lum ban lang ia u kba. Ka seng Tyrso Valley Wildlife Protection Society ka la pynlong ruh ïa kane ka tamasa da ka jingthmu ban iada kyrpang ïa kine ki sem bad ruh ka thong ban pynlong ïa katei ka jaka kum kawei na ka jaka jngohkai pyrthei da ka jingwan poi kitei ki sim kbeit kiba la kot da ki lak tylli.
Haba ai jingkren ha kane ka sngi, u Bah A.L Heh kum u myntri sorkar, u la ai ka jingkhublei ia ka Society kaba la pynlong ïa kane ka tamasa ha kaba ka thong hi ka long ban ïada kyrpang ïa kitei ki sim bad ka jingwan kine ki jaid siem ka long ruh ban khring ïa kiba bun ki nongjngohkai pyrthei.
Kum u myntri ka sorkar, u la kular ruh ban don ka jingïatrei lang na ka bynta ban pynneh pynsah ïa kine ki sim bad kan poi ka por ba lada lah ban ïada kyrpang ïa kine ki sim katei ka jaka kan sa long ka jaka jngohkai pyrthei ka ban ai jingmyntoi na ka bynta ban kyntiew ïa ka ïoh ka kot jong ka dong ka thaiñ bad ka jylla hi barioh kawei.
