Shillong, Jylliew 12: Ka State Rural Employment Society (SRES), kaba dei ka State Nodal Implementing Agency na ka bynta ka Dharti Aaba Janjatiya Gram Utkarsh Abhiyan (DA-JUGA), ka la pynlong ïa ka jingïalang ha ka jylla hapoh ka jingpynïaid Secretary of Community & Rural Development (C&RD).
La pynlong ïa ka jingïalang ha ka jingdon u State Prabhari Officer and Econimic Adviser (Ministry of Tribal Affairs), nangta ki nongmihkhmat na ki tnat bapher bapher, ba kynthup ïa ki ophisar na ki District bad Block, haba ïadei bad ka jingsdang ki kam hapoh ka DA-JGUA.
La ong ba ka DA-JGUA kadei ka jingsdang kaba pynleit jingmut ban kyntiew ïa ka ïoh ka kot ka imlang sahlang bad kumjuh ruh kaba khmih ïa ki jingduna ha ki kam jingtei ha ki jaitbynriew riewlum, ha kaba kane ka la rung ha ka kyrdan kaba thymmai. Ban rakhe ïa ka jingktah ba la wanrah da ka DA-JGUA kaba dang ïaid, la pynleit jingmut ha ki lad jingtip ha kaba ïadei bad ka pule puthi, bad ki lad jingïakren ba bun rukom ha kaba kane ka kam ïalap la buh ba kan sdang naduh ka 15 tarik u Jylliew haduh ka 30 tarik une u bnai, ha baroh ki 437 tylli ki shnong ha kylleng ka jylla Meghalaya.
Kane ka jingïalap kaba la pynkhreh bha ha ka por kaba dei kan ai ka jingshakri kaba kongsan bad ban sam ïa ki lad jingtip shaphang ki skhim bapher bapher jong ka sorkar kiba dei ban poi beit sha ki nongshong shnong, da kaba pynthikna ba ki lad jingmyntoi ki dei ban poi sha ki kyndong kynshrot jong ka jylla.
Ki mat lamphang ka jingïalap ka IEC ka kynthup ka jingpynlong ïa ki prokram ha ki shnong bad ha ki kyrdan cluster ban pynsuk ïa ka jingpynpoi ki kam kiba kongsan.
Nangta ka jingpynlong ïa ki Awareness Program, kum ki jingïalang ki ban ai jingtip ïa ki nongshong shnong haba ïadei bad ki skhim sorkar bad ki jingmyntoi ba dei ban ïoh na ki, da kaba pynthikna ruh ba ki nongshong shnong ha ki jaka riewlum kin ïoh ki jingtip kiba dei hok ban ïoh.
Nangta ka don ka jingthmu ban pyndon ka jingïatreilang hapdeng ki tnat bapher bapher halor ki kam kiba kongsan na ka bynta ki paidbah.
Kane ka jingïalang state-level kaba la long ha kane ka sngi la ïakren shaphang ki jingaiti jong ka sorkar na ka bynta ka bha ka miat ki nongshong shnong, bad ban pynshlur ïa ki dkhot ki shnong ban ïashim bynta ha kum kine ki kam, bad ban pynthikna ïa ka jingjop ki kam ïalap ka IEC. La kyntu ruh ïa baroh ki nongshong shnong ban ïashim bynta shitrhem bad ban kyrshan ïa kane ka jingsdang, khnang ba kan long ka jingnoh synniang haba ïadei bad ka jingpyntreikam ïa ka prokram ka DA-JGUA ka ban plie lad plie lynti ïa ki kam pynroi kiba neh ha ki thaiñ riewlum.
