Sdang ka Shillong Cricket Association-A & East Garo Hills DCA ïa ka lympung da ka namjop

Shillong, Nailur 18: Hynne ka Lah Sngi U Blei la ïoh ban pynïaid shakhmat ïa ka jingïalehkai jong ka Meghalaya Cricket Association’s U-19 Boys Inter District Cricket Tournament, kaba la sdang hadien ba la kut ka final jong ka tournament ki kynthei.
Ha kane ka sngi la sakhi ïa ar tylli ki jingïakhun, ha kaba ka Shillong Cricket Association-A bad ka East Garo Hills District Cricket Association ki la sdang ïa ka lympung da ka namjop da kaba pynliem ïa ka SCA-B bad ka South Garo Hills DCA.
Haba phai sha ka jingïalehkai kaba la pynlong ha madan Umbuda Ground ha Nongpoh, ka kynhun ïalehkai jong ka SCA-B ka la hap ban tied nyngkong hadien ba rem ïa ka toss bad ki la lah ban sdang da kaba seisoh bad shah pynhap tang shi wicket ka ron pat 81, bad ka nam ka long sha u Shubham Rasaily u ba la ïoh ban kamai 22 ron, Manthan Dey (19) bad u Josiah Wanniang (14).
U Josiah u la shah pynhap noh ha u Charm Marbaniang, bad hadien bun na ki wicket ki la sdang ban bud wei hadien u wei, ha kaba ka SCA-B ka la duh haduh phra wicket tang 13 ba ki ïoh kamai ron bad shah pynhap baroh bad kynjoh tang sha ka 94 ron hapoh ka 16.1 over.
U Charm u la ai mynsiem ïa ka kynhun da kaba khur haduh 6/6 lyngba ki 3 over bad kaba la pynïoh ïa u ïa ka khusnam Player of the Match.
Haba beh ïa ka ron na ka kynhun SCA-A, u Kshitij Singhania u duna tang shi ron ban kynjoh sha ka half-century, da 49 runs (3x4s, 4x6s) kiba la wan lyngba ki 35 bol. Ha kawei pat ka liang, u Pushkar Raj, u la ïoh ban ïarap 24 ron na ki 18 bol shuwa ban shah pynhap. Ryngkatlang ki la ïoh ban ïarap 64 ron shuwa ban shah pynhap shi wicket. U Kshitij um shym la ïoh ban sakhi ïa kane ka jingïakhun hynrei na ka liang jong ka SCA-A ka dang lah ban pyndep ban beh ïa ka ron tang ha ka 10.2 over.
Haba phai sha kawei pat ka jingïakhun, ka South Garo Hills ka la jop ïa ka toss bad ka la jied ban tied nyngkong, katba ka la shah pynhap noh tang 56 ron na ki 12.3 over. Ym shym la don mano mano ba kynjoh sha ka phew ron, katba na ka liang ki nongkawangbol jong ka EGH ki la ïoh ban khur wickets.
U Paisal Ali u la khur 3/5 na ki 3 over, katba u paralok jong u, u Aristo R Marak u la khur (2/9), u Gulgul Sangma (2/17) bad u Bilgrak G Sangma (2/19). Haba beh ïa ka ron, ka EGH ka la hap ar wicket tang mar ïasdang hynrei ka ron na u Lensbirth N Marak (25 not out) bad u Aristo (12 not out) ka la kyntiew ïa ka EGH ban khur ïa ka namjop da phra wicket. U Paisal u la ïoh khur ïa ka nam Player of the Match.