Sdang ka Reliance Foundation Young Champs (RFYC) Naupang League ha Mizoram

Aizwal, Nohprah 03 : Ka Mizoram Football Association bad ka Reliance Foundation, kaba dei ka shnat treikam jong ka Reliance Industries Ltd (RIL) ki la sdang ban pynïalehkai ïa ka Reliance Foundation Young Champs (RFYC) Naupang League ha Mizoram ha u Naiwieng 2022.
Ha ka sngi plie pyrda ïa katei ka lympung ïalehkai phutbol ha Aizwal bad Champai la sakhi ba ki la don haduh 1300 ki khynnah kynthei bad shynrang kiba la wan ban sakhi bad ïalehkai da ka jingkmen. Ka Naupang League ka thong ka long ban kyntiew ïa ki khynnah rit jong katei ka thaiñ bad ka jingai mynsiem na bynta ki khynnah don sap ha ka jingïalehkai phutbol ha ka rta ba dang 5 snem ba kin ïashim bynta. Halor ka jingpynlong ïa katei ka lympung ïalehkai, na ka liang u coach ka kynhun ïalehkai U-13 jong ka Ramhlun Veng u Lalthatluanga u la ong, “Ngi la kilan met tyngeh na bynta ka Naupang League. Ngi la sdang ban kilan met ha ka por 6 baje mynstep na bynta lai kynta ha kaba ki khynnah ki la kilan met tyngeh, la ka long ha ka liang ka bor met ruh, bad kumjuh ruh ban ïoh jingtip shaphang kumno ban nang kham pynjanai ha ki jingïalehkai.”
“Ngi dap da ka jingsngewkmen ba ka Reliance Foundation Young Champs Naupang League ka la wan hangne, namar kadei ruh ka sien kaba nyngkong bad baroh ki dap da ka jingsngewkmen. Ka Reliance Foundation ka la ai sngewbha ha ngi ïa baroh ki jingdonkam ban ïalehkai bad ki khynnah mynta ki da ap khmih lynti ban ïoh kilan met bad ban ïalehkai.”
U Lalhrechianga, u kpa jong ka Ngurhlunchhungi, kaba dei ka khynnah ïalehkai U-11 kaba mih madan na bynta ka Chawmpui Veng u la ong, “Ka khun jong nga ka la ïalehkai naduh ba ka dang kham rit, bad nga dap da ka jingsngewkmen ban ïohi ba ka ïalehkai ha ka Naupang League.”
“Nga dap da ka jingsngewkmen ba ka Reliance Foundation Young Champs Naupang League ka la ïoh ban pynlong hangne. Ka Naupang league kadei ka kabu bad kaba biang tam kaba ïarap ïa ka khun jong nga ba kan kylla long ka nongïalehkai phutbol kaba kynsai. Ka da kwah ban ïoh ïalehkai kham bun la ka long kan ïalehkai pyrshah ïa ki shynrang ne kynthei ruh, ngi dap shisha da ka jingsngewkmen.”