Ka dei ka sngi U Blei bad lehse ym bun eh kiba pule bniah ha ki jingthoh ha ka kot khubor ha kum kane ka sngi. Hynrei lada kumno re phi ioh ban pule ia kane ka bynta ngin pyrshang ban maitphang khyndiat halor katei ka phang “Ka jingpynshoi kam dei ka pop”. Hooid ka lah ban long shisha kumta ruh, Niuma haduh katno ka long kaba shisha pura hynrei na kiba bun ki jingphla jong kmie ki kpa kiba iakynduh jingeh: ka jingpynshoi ka long ka jingma kaba khraw khamtam eh ia ki khynnah ba dangkhie danglung ne ki teenagers ba ong ka ktien phareng.
Kane ka long tang ka jingpyrshang ban pashat jingmut khamtam sha ki kmie ki kpa ban peit ba kum kane ka bor pyrkhat kan ym ioh ban rung ha ki khun jong ki. Namar haba kum ki kmie ki ki kpa ki ialeh katba lah ban khanglad ia ki khun rit na ki jingpynshoi hynrei ki ioh pynban da ka jubab ba “Ka jingpynshoi kam dei ka pop” wat la ngi tip ba ka jingpynshoi kam ju wan satia na U Blei. Ha kaba shim ba ki khun ki la shemphang ia kata, la ai jingsur ia ki ban im laitluid bad ka jingmih ka long kaba mynsaw bad ktah ia ka lawei jong ki hi.
Kane ka long kum ka jingai jingmut, bad puson khyndiat naka bynta ka jingbha jong ki longiing khamtam kiba don ia ki khun kiba dang sdang khie samla ne teenager. Hynrei lada ong ban iatai halor kane ka phang kane ka mat ruh kan ksan bha ha kiba bun ki liang khamtam naka bynta kiba la san la rangbah. Baroh ngi tip ba ka Jingpynshoi hi ka long ka jingma bad kum ki kmie ki kpa niar eh ba ngin buh ia la ki khun ha ka jingma. Ka long kaba donkam ban buh pud ia la ki khun rit khnang ba kin lait na ki jingeh kiba pynbabe ia ki hadien habud.
Ha kawei na ka jingialang bad ki kmie ki kpa, I Principal jong kawei ka skul ba la pawbha kyrpang tang ia ki khynnah kynthei, ha ka Nongbah Shillong i la bynniaw bad ban jur ia ki kmie ki kpa ba kin long kiba phikir bad peitngor ia la ki khun. Ka Mobile phone ka dei kawei na ki atiar kaba khlain tam jong kane ka juk mynta, bad baroh ki sakhi ba i khyllung ba dang hapoh 2 snem ruh i la lah ban pyntreikam ia ka, katno tam lei ki khynnah kiba la pule ha ki Class VI Shaneng. Na ka liang jong I Principal ila pynpaw ia ka jingkyndit kaba khraw ban iohi haduh katno ki khynnah ki la jam shabar u pud jong ka jinglong ki khynnah wat ha ka skul kaba pyrkhing bha ia ki.
Ki khynnah skul ki long kiba sian haduh katta katta bad halor jong katei ka nongrim “ka jingpynshoi kam dei ka pop” ki ioh ban riehtngen wat na ki kmie ki kpa kiba shaniah bad ieit ia ki. La shem ba wat haduh ki por shiteng synia bad janshai ruh ki khynnah kiba iohlad ki ngam ha ki jinpynshoi ban iasnoh bad ka pyrthei kaba shabar na la ka jong ka tnum lyngba ki Social Media kum ka Face Book, Instagram, WhatsApp wat tang na ki Text Messages ruh. Khamtam lei ki kmie ki kpa kiba dang duna, ki shem jingeh shibun ban buh pud ia la ki jong ki khun namar ka jingstad jong ki ban pyni ia ka daw bad ka nongrim kaba sngew kumba ka la dei bha. Hynrei hadien pat ki mad da ka kam kaba ki iohi ba ki khun jong ki ki la sdang ban kham leh kiar na la ki jong ki kmie ki kpa bad wat la ki smat bha ban leit jingaiseng ruh ka jinglong jong ki pat ka pher bha.
Shisha kine ki sngi ki long kiba kham khyllah haduh katta katta bad ka la iapher bak lybak na ki sngi bad ki por kiba la leit noh. Kumta ki kmie ki kpa ki dei ban long kiba phikir bha ia la ka jong ka longiing bad khamtam ia la ki khun kiba dang khie dang san. Kum ka longiing ka long kaba donkam ban phai sha la u Nongthaw bad ban duwai khlem da pud khnang ba kin lah ban ioh ia ka longiing kaba lait na kiba bun ki kynrum kynram. Ka jingim jong ki khun samla ha kine ki sngi ka don shisha ha ka jingma bad ka longiing hi baroh kawei ka donkam palat ia ka jingkyrkhu U Blei, ka spah kan long ka nongshukor kaba khraw lada ki briew ki phiel ha ka jingaidei jong ki bad U Blei.
