Nongstoiñ, Nailur 29: Ki Bor Synshar District ka West Khasi Hills, District, Nongstoiñ ha ka sngi Palei ki la sdang ïa ka prokram pynkhuid ïa ki sawdong sawkun jong ka District bad kane kan neh saw sngi lynter, kata haduh ka 1 tarik U Risaw 2023, halor ka jingthmu ban ïoh ïa ki sawdong sawkun kiba khuid kiba suba na ka bynta ki nongshong shnong jong ka distrik.
Kane ka jingpynkhuid ka dei kum shi bynta jong ka Swachhata Hi Seva 2023, ka campaign kaba la pyntreikam da ka Sorkar India na ka bynta ban kyntiew ïa ka khuid ka suba bad ka koit ka khiah ha baroh kawei ka Ri. Ïa kane prokram la sdang naduh ka 15 tarik U Nailur 2023 bad kan bteng haduh ka 2 tarik U Risaw, 2023.
Hapoh West Khasi Hills, District, la sdang da ka jingpynkhuid ïa ka phang Mihngi bad Sepngi jong ka ophis U Deputy Commissioner, kaba kynthup ruh ïa ki bynta ba don ka canteen jong ka ophis, haba ki Ophisar bad ki nongtrei sorkar jong katei ka ophis, ki la pynkhuid ïa ki ñiut ki ñier kiba don hapoh ka sawdong sawkun jong ka ophis bad ban bret ïa ki ha ka rukom kaba dei.
Nangta ha ka 29 bad 30 tarik U Nailur, 2023 ka jingypnkhuid kan long na ka bynta ka phang Shatei bad Shathie, kumjuh ruh ïa ki bynta kiba don shapoh jong ka ophis bad ha ka 1 tarik U Risaw 2023 pat, ka jingpynkhuid kan long na bynta ka wah Nonbah bad ïa ka Ïew Nongstoiñ.
Ki Bor Synshar District, ki la kyntu ïa baroh ki nongshong shnong ba kin ïasnoh kti lang ha kane ka prokram pynkhuid shnong, khnang ba ka dong ka thaiñ kan khuid kan suba bad ban ïoh ïa ka koit ka khiah bad ban pynlong ïa ka Ri India kaba lait na ki jaboh ki jabaiñ.
