Shillong, Nailur 02: Ka lympung ïalehkai phutbol kyrdan Second Division 2024 jong ka Shillong Sports Association kaba la sdang ha ka Lah Sngi U Blei (02 tarik Nailur, 2024) ha SSA Stadium, Polo, ha kaba ha ki jingïakhun la sakhi ïa ka Meghalaya Police bad ka Smit SC kiba la sdang ïa ka jingïaidlynti da kaba khur lai point hadien ka namjop.
Ha ka jingïakhun kaba nyngkong, ka MLP ka la pynjemkhnap da 5-1 kol ïa ka Sohiong SC. U Wanshemlang Mawlong (9 min, 16 min) u la ïoh ban thep ar kol na bynta ka MLP, katba u Niawkorlang Kyndiah (53 min), u Aldrin M Ramsiej (80 min) bad u Rapborlang Marwein (87 min) ki la ïoh ban pynkhihjar mar kawei. Ka Sohiong ka la ïoh ban pynphai ïa ka shi kol lyngba u Shanborlang Mawlong ha ka 34 minit.
Ha ka jingïakhun kaba bud, ka Smit SC ka la pynliem suk da 4-0 kol ïa ka Umphrup SC. Ka kynhun ka la sdang pynkhihjar shuwa lyngba u Damewanshan Nengnong ha ka minit ba 12 bad u la pynbud ïa ka kol kaba ar ha ka 53 minit, u Apburom Nongrum u la thep ïa ka kol kaba lai ha ka 71 minit bad khadduh na u Nathaniel Kharbyngar ha ka 74 minit.
Da kane ka namjop, baroh ar tylli ki kynhun (MLP bad ka Smit SC) ki la ïoh ban khur mar 3 point na ka Group-A.
Ka jingïakhun mynta ka sngi kan long hapdeng ki kynhun na ka thup jong ka Group B, ha ka por 12:45 baje mynsngi ka PFR Football Academy kan aireng pyrshah ïa ka Mylliem Lum SC, nangta ha ka por 3:45 baje nohphaisngi ka Jongksha SC kan ïakhun pyrshah ïa ka Nongkrem SC. Baroh ar tylli kin long ha madan SSA Stadium, Polo.
