Sdang ka lympung State Athletic Meet jong ki skul ha SAI, NEHU, poi palat 780 ngut ki nongïalehkai

Shillong, Jymmang 20 : Ka Directorate of Sports & Youth Affairs jong ka sorkar Meghalaya ryngkat ka jingïatreilang bad ka Meghalaya Athletics Association, ka la plie paidbah ïa ka State Level Inter-School Athletic Meet 2025 mynta ka sngi ha SAI STC, NEHU Shillong Campus.
Kane ka lympung ïalehkai kaba sdang naduh mynta ka sngi ka 20 tarik haduh ka 22 tarik mynta u bnai, ka dei ka lad na ka bynta ki samla ïalehkai jong ka Meghalaya ban pyni ïa ka sap bad ka jingkut jingmut jong ki ha ka lympung ïalehkai.
La donlang ruh ha kane ka sngi naduh ki heh sorkar ba kynthup ïa u Richard Yanthan, IAS, Joint Secretary, Sports & Youth Affairs department, kum u kongsan, Bah John F Kharshiing, Working President, Meghalaya State Olympic Association (MSOA) kum u Symbud Kongsan, u DD Shira, Director Sports & Youth Affairs, Bah Finely Pariat, General Secretary ka MSOA bad kiwei ki heh sorkar jong ka tnad ïalehkai, ki heh pulit, ki nonghikai bad ruh ki nongmihkhmat na ka Meghalaya Athletics Association kumjuh ki samla pule.
Ha ka jingkren, u Kongsan u la ong, “Kane ka lympung ïalehkai ka wad ban ithuh ïa ka bor jong ka jingïalehkai bad ka jingïalehkai ha kaba pynwan dur ïa ka jingim, khamtam jong ki samla.
Ka sorkar ka thrang ban pynlong ïa ka Meghalaya kum shlem ban sei ïa ki nongïalehkai kiba tbit ha ki snem ban wan, na ka bynta kane ka sorkar ka bei tyngka ha ka jingpynroi ïa ki jingtei, bad ka jingpyntbit ïa ki nongïalehkai lyngba ki skhim bad ki polisi bapher bapher kiba dang pyntreikam”.
Na ka liang u Bah John F Kharshiing, Working President ka MSOA, u la pynpaw ba kane ka jingïalehkai ka long kaba donkam bha namar ba ka jylla Meghalaya ka pynkhreh ban pdiang ïa ka National Games kaba 39 ha u snem 2027. U la ong ruh ba kane ka lympung ka long kum ka jingpynkhreh na bynta kane ka lympung bah.
Katba na ka liang u DD Shira u la pynbna ba kane ka state athletic meet ka dei ka jingkynduh lang jong baroh ki lympung ïalehkai na ki distrik kaba kynthup ïa ki 780 ngut ki nongïalehkai ha ki 48 tylli ki jingïakhun ha ki rta kiba bapher bapher kkynthup ïa ki 36 ngut ki bor pynïaid nalor ki 200 ngut ki nongïarap ne ki volunteer ha ki jait jingïalehkai bapher bapher.