Sdang ka Laitkor SC, PFR FA bad ka Rangdajied United ïa ka SSA Women’s League da ka jingjop

SHILLONG, Kyllalyngkot 05: Ka Shillong Sports Association Women’s Football League 2026 ka la sdang hynne ka sngi Nyngkong (05 tarik Kyllalyngkot) ha kaba lai tylli ki kynhun, ba kynthup ïa ka Laitkor SC, Pay For Right Football Accademy bad ka Rangdajied United FC ki la sdang ïa la ki jong ki jingïalehkai da ka jingjop.
Baroh ki jingïalehkai la pynlong ha madan First Ground-SSA Stadium, Polo.
Ka jingjop kaba shyrkhei tam ha kane ka sngi ka la long na ka bynta ki thei ïalehkai ka PFR FA, kiba la pynjemkhnap haduh 8-0 kol ïa ka Mawkasiang SC, ha kaba ka Ridalin Suting (11, 14 & 53’) bad ka Makrisha Songthiang (19, 51 & 66’) ki la thep hat trick.
Katba ka Aitihun Majaw (48’) bad ka Nisilia Majaw (70’) ki la ïoh ban thep mar shi kol.
Shuwa kane ha ka jingïalehkai ba nyngkong, ka Laitkor SC, kaba rah ïa ka nam lahduh ha ka aïom lehkai ba ladep, ka la sdang ïa ka jingïalehkai ba nyngkong da kaba pynliem noh da 2-0 kol ïa ka Nongthymmai SC.
ïa kine ki ar kol la thep da ka Darishisha Kharlyngdoh (19’) bad ka Cynthia Mylliemumlong (35’).
Ka jingïalehkai ba khatduh la ïohi ïa ka Rangdajied United FC kaba la jop suk da 5-0 kol ïa ka Nongrim Hills SC.
Ka Rangdajied United ka la lamkhmat ïa ka jingïakhun da 2 kol ha ka kylla step lyngba ka Bainangsan Langbnang (17’) bad ka Baiahunshisha Lyngdoh Nongbri (26’), shuwa ba ka Ideibanrishisha Kharpran (40’), ka Inrilaidor Khongthaw (47’) bad ka Rimika Kongkai (62’) kin bynrap sa lai tylli ki kol ha ka kylla miet ban pynskhem ïa ka jingjop.
Da kaba jop ïa la ki jong ki jingïakhun, baroh lai tylli ki kynhun ki la ïoh ban lamkhmat ïa la ki jong ki Group, ha kaba ka Laitkor SC ka wan ba nyngkong ha ka Group A, ka PFR FA ha ka Group B: bad ka Rangdajied United FC ïa ka Group C.
Ka SSA Women’s Football league 2026 kan bteng biang da lai tylli ki jingïalehkai ha kane ka sngi Ba-ar (06.01.2026), ha kaba ka jingïakhun ba nyngkong ha ka por 10:30 baje mynstep kan long hapdeng ka Lawei SC pyrshah ïa ka Lumparing SC (Group B).
Ha ka por 12:30 baje mynsngi ka Mawshubuit SC kan aireng pyrshah ïa ka Umrynjah SC (Group A), nangta ka jingïalehkai ba khatduh ha ka por 2:30 baje nohphai sngi kan long hapdeng ka New Challenger FA pyrshah ïa ka Kharang SC (Group C).
Ban shu pynkynmaw, mynta u snem ki don haduh 13 tylli ki kynhun ki ban ïashim bynta bad la phiah ïa ki ha ki lai tylli ki Group (A, B bad C). Ka Group A bad C ki don mar saw tylli ki kynhun, katba ka Group B kadei kaba heh tam, ha kaba ka don don san tylli ki kynhun.
ïa kane ka lympung yn pynïalehkai ha ka rukom ïakhun Group League, ha kaba ki kynhun nongjop bad kiba wan kyrdan ba-ar na kawei pa kawei ka Group (A, B, C) bad ar tylli ki kynhun kyrdan ba-lai ba kham kynsai kin ïoh rung sha ka Quarter Final, ïa kaba yn pynïakhun ha ka rukom ïalehkai kaba tang shi wait ne Knock Out.
Ka Group A ka kynthup ïa ka Laitkor SC ka kynhun kaba bat ïa ka nam lahduh, ryngkat ka Nongthymmai SC, Mawshbuit SC bad ka Umrynjah SC; ka PFR FA, Mawkasiang SC, Lawei SC, Lumparing SC bad ka Lawsohtun SC ki la shah kynthup ha ka Group B; nangta ka Group C ka don ïa ka Rangdajied United FC, Nongrim Hills SC, New Challenger FA bad ka Kharang SC.
Ki jingïalehkai Group stage kin bteng haduh 14 tarik u Kyllalyngkot. ïa ki jingïakhun Quarter Final yn pynlong ha ka 16 bad 17 tarik Kyllalyngkot, nangta baroh ar tylli ki Semi final yn pynlong ha ka 20 tarik, bad yn pynkut ïa ka lympung ha ka 24 tarik Kyllalyngkot-2026 (final).