Sdang ka JMB bad MBS&G ban leit pynsngewthuh sha ki khynnah skul ban long kiba leh khuid 

Jowai, Nailar 03 : Ka Jowai Municipal Board (JMB) ha ryngkat ka jingïatreilang bad ka Meghalaya Bharat Scouts & Guides, West Jaiñtia Hills halor ka thong ban wanrah ïa ka jingkhuid jingsuba jong ka shnong ka thaw bad ki sawdong sawkun jong ka mariang halor ka phang kaba ong ‘Keep Jowai Town Clean’.
Mynta ka sngi Balang kala pynlong ïa ka prokram ai jinghikai shapang ka Waste Management and Sanitation Under Bharat Mission’ ha ki lai tylli ki skul kiba don hapoh ka sor Jowai, kiba kynthup ha Jowai Govt. Boy’s Higher Secondary School, Govt. Girls Higher Secondary School bad ka Marian Hill Higher Secondary School.
Na ka liang ki dkhot ka Meghalaya Bharat Scouts & Guides kiba la wan sha kane ka sngi ban ai ki jingbatai bniah ïa ki khynnah skul ki kynthup ïa u ma Ohiwot Laloo, District Secretary, MBS&G-WJHD, u Rising Kharngi (Scouts Master), u Stopper Phira (Scout Master), ka C.D. Laloo (Guide Captain), u Pet Dhar (Scouts Master), kaLamisakani Dkhar (Guide Captain), u Julius Pakem, (Scouts Master), u Teilangki Rymbai (Scout Master) bad ka Aidasuk Warlarpih (Guide Captain).
Kitei kiba ai jingkren na ka Meghalaya Bharat scouts & Guides kila ban jur ïa ki khynnah skul ba kin don ka jingkitkhleih ban wanrah ïa ka khuid ka suba da kaba sdang shwa dalade bad ha ka juh ka por kum ki khynnah skul ki dei ban long ki nuksa babha na ka bynta kiwei.
Ha kane ka sngi la ïoh ka batai ïa ki khynnah skul ba kin tip kumno ban pynbynta ïa ki ñiut kiba mih na ki ïing ki sem da kaba pyndonkam ïa ka ‘Blue Bin’ bad ka ‘Green Bin’, ïa kine ki bin ka tnad Jowai Municipal Board kala dep ban sam sha manla ki thliew ïing ha sor Jowai khnang ba kan pynsuk kumjuh ïa ki nongtrei katei ka tnad bad leit lum ïa ki ñiut na ki dong bapher bapher katkum ki sngi ba la pynbeit.