Sdang ka jingrakhe dap 50 snem ka Govt. Girls’ Higher Secondary School Jowai

Jowai, Lber 20: Kawei na ki skul sorkar kaba paw bha ha sor Jowai kata ka Govt. Girls’ Higher Secondary School, Jowai mynta ka sngi palei 20 tarik u Lber, 2025 ka la sdang ban lehkmen ïa ka jingrakhe ‘Jubilee Ksiar’ ne ka jingdap 50 snem ka jingshakri jingnang jingstad sha ki khynnah skul.
Ïa ka jingïalang hapdeng ka jingiphuh iphieng la pynlong ha madan Jrisaleiñ ha kaba u MLA ka Jowai u ma Wailadmiki Shylla ula long kum u kongsan haka jingdonlang ka symbud kongsan ka Jt. Director of School Education and Literacy (District) Jowai West Jaiñtia Hills kong Almo Parisha Syiem, ka Principal Dr. Wa-i-sa Sumer, ki nonghikai, ki khynnah skul kynthup ïa kiba thymmai bad kiba rim kila wan shong shit sha kane prokram.
Ka Govt. Girls’ Higher Secondary School, Jowai ka dei ka skul kaba ai jinghikai na ka bynta ki kynnah kynthei ïa kaba la seng naduh u snem 1975, kaba don ïa ka moto “Think, Act & Flourish”, ha ka jingïaid lynti ha u snem 1988 ka la ïoh ïa ka Building ba thymmai ba peit da ka tnad PWD, ha u snem 1997 ka pynkiew kyrdan ïa ka Govt. Girls Secondary School, sha ka Higher Secondary School da kaba sdang ïa ka Arts Stream.
Ha u snem 2012 la plie ïa u maw nongrim ban tie ïa ka Science Stream da u Prof. R.C. Laloo MLA ba rim bad ha u snem ba bud 2013 la lah ban pyndep ïa ka, ha u 2022 la lah ruh ban plie ia ka jingai jinghikai ha ka por mynstep (Morning Section), ha u snem 2023 ka skul ka la sngewdonkam sa ka Commerce Stream bad mynta ka sngi la plie pyrda ïa ka da u ma Wailadmiki Shylla (MLA).
Ka jingdon kane ka skul sorkar ka la ïarap shibun eh ïa ki khynnah na ki thaiñ nongkyndong ban wan pule ha kane ka skul kynthup ïa ki khynnah kiba dei hapoh ka sor Jowai bad na ki shnong ba marjan, katba dang mih u snem ki khynnah ki dang buh ha ka jingwan rung skul kaba la kynjoh sha ka shi hajar ngut mynta.
Ka skul ka la pynleit jingmut ruh ban pynkiew ïa ki khynnah skul ha kiba bun ki liang khamtam haka kam ïalehkai Sports bad kiwei de ki sap ba ki khynnah ki don, kumba long mynta ka skul ka dang donkam sa ïa ka Auditorium khnang ba ki khynnah skul kin ïoh ban pynpaw ïala ki sap ki phong ba ki don. Ka skul ka la wan bha shakhmat haka jingleit ïashim bynta ha kino kino ki prokram bala pynlong.
U ma Wailadmiki Shylla haka jingai jingkren ula ai ka jingïaroh ïa ki nongpynïaid jong ka skul kiba la lah ban pynïaid ïa ka skul haduh ka jingdap 50 snem, da kaba u ai ka jingïaroh ïa ki riew proh jabieng ha ki kyrdan bapher bapher kila mih na kane ka skul sorkar.
Ula ong ka sorkar ka la trei shitom ban pynkiew ïa ka pule puthi hapoh ka jylla lyngba ka jingïalam u Myntri Rangbah u Conrad K. Sangma, ka jylla mynta ka don haduh 15 hajar tam ki skul kiba ka sorkar kan hap ban ai jingïarap.
Na ka liang jong u un pyrshah katba lah ha kine ki sngi ban wan ban ïarap ïa ki jingdonkam jong ka skul khamtam ïa ka Hostel bad ban pynrung skul khambun ïa ki khynnah. Ula kyntu ïa ki nongpynïaid skul ban pynshlur ïa ki khynnah ban shim kabu ïa ka Chief Minister Scholarship ba dang plie thymmai da u myntri rangbah.
La pynphuh shuh shuh ïa kane ka sngi jong ka jingsdang rakhe ïa ka Jubilee Ksiar jong ka skul da ka jingïashim bynta ki khynnah skul ha ki jingrwai, ki jingshad tynrai, ka Mass Drill, Garo Folk dance, Recitation, ka jingrwai Jubilee na ki Nonghikai, ka jingpynher ïa ka lama bad ka jingot ïa u cake jong ka jingdap 50 snem ka skul da u kongsan.