Shillong, Nailar 06 : Ka All India Trinamool Congress (AITC) kaba don ha ka liang pyrshah hapoh ka jylla ha ka sngi Saitjaiñ ka la sdang ïa ka lympung ïalehkai football ha South Tura Constituency kaba la tip kum ka Independence Cup Football Tournament ha madan Tura, West Garo Hills District.
Ïa katei ka lympung la plie pyrda ïa ka da u nongïalam ka AITC uba dei ruh u MLA ka Rangsakona u Zenith Sangma ha ka jingdonlang u Richard M Marak DC ka West Garo Hills District bad kiwei kiwei ki nongïalam jong ka party.
Ha kane ka sngi sdang ki ar tylli ki team kiba la mih madan nyngkong ki long hapdeng ka Team Hawakhana bad Team Reserve Gittim, ha kaba baroh kidei na South Tura Constituency.
Ka TMC Meghalaya ka pynlong ïa ki tournament ha kylleng jong ka jylla ban ai mynsiem ban kyntiew ïa ki sap jong ki nongïalehkai ym tang ha ka liang ka jingïalehkai hynrei ha ka liang ka koit ka khiah.
Haba ai jingkren ha kane ka sngi plie pyrda kum u kongsan, u Zenith Sangma u la pynpaw ïa ka thong jong ka Trinamool Congress na bynta ka ilekshon ban wan da kaba ong, “Ka TMC kadei ka party kaba don ka thong ban kyntiew ïa ki samla bad ngin dang bteng ban pynlong ïa kiba bun ki jait jingïalehkai ha ki sngi ki por ba dang wan. Ngi ngeit skhem ba ki jingïalehkai ki wanrah ka jinglong ryntih bad ka koit ka khiah, kumta ngin trei shitom ban pynïaid shaphrang da kaba shna ïa ki madan ïalehkai na bynta ki samla jong ka jylla.”
Na ka liang u Richard Marak uba dei u District Convenor jong ka Meghalaya TMC u la pdiang sngewbha ïa u Zenith Sangma bad ïa kiwei ki nongïalam ha ka jingplie pyrda ïa katei ka lympung ïalehkai football. Kiwei kiwei ki nongïalam kiba la don lang ha katei ka sngi ki kynthup ïa u Safford N Sangna Coordinator jong ka TMC West Garo Hills District, Noverfield R Marak former MLA jong ka North Tura constituency bad Rupert M Sangma MDA barim na Tura.
