Shillong, Jylliew 18 : Ka HYC Mawlai Umjaiur Unit mynta ka janmiet jong ka 17 tarik Jylliew 2023 ka la ïoh ban plie pyrda ïa ka Tur Shaphrang Football Knockout Tournament ha Mawlai Madan Heh, ha kaba ka Tphang pdeng (Theme) jong katei ka tournament ka long “Say no to drugs, yes to football” (ong em ïa u drok, hooid ïa ka phutbol).
Ki Team baroh kiba la iashim bynta ha kane ka tournament ki don 32 tylli, ia kaba ki la wan na kylleng ka thain jong ka bri u Hynniewtrep.
La pyniaid ia kane ka Jingialang da u President ka Umjaiur unit Bah T. Nongrem, kiba la ai jingkren ki long Bah Arup Pasah Symbud Kongsan uba dei ruh u samla uba la kyrni ha ki jingdih drok ha ki por kiba mynshwa bad u ba dei ruh u trai jong ka Grace Foundation centre kaba don ha Assam.
Haba ai jingkren u la iathuh shaphang ka jingim lade ha ki por ba u la ngop ha u drok bad u la hikai ruh ia ki samla kiba iashim bynta ha kane ka tournament ba kim dei da lei lei ban ktah ia u drok ne ki jingdih kiba sniew namar Wei ba phi la ktah kan eh shibun ba phin bthat ne pyllait na uta u kynjri jong ka jingshah mraw.
U la iathuh ba ki khynnah hapoh Rehabilitation centre jong u na ka 150 ngut 70 ngut ei ei ki la don positive.
U pynpaw ka jingainguh ruh ia U Blei Nongbuh Nongthaw namar dei lyngba jong u, u long kumne mynta, da kaba u la ioh ban hikai ruh ia kiwei kumno ban lait na u drok.
U Bah Donboklang Kharlyngdoh haba ai jingkren u pynpaw ka jingsngew bynniaw haba iadei bad ka jingkiew jong kiba kyrni ne dih drok hapoh ka Jylla kaba la poi haduh 2 lak tam, u la pynpaw ka jingaikhublei ia ka Umjaiur unit ba ka la pynlong ia kane ka phutbol halor ka phangpdeng “Say no to drugs,yes to football”
U la kyntu ia ki players jong baroh ki Team ba kin pynmlien ia lade ban ieit ia ki kam kilan met (sports) ka lah ban dei ka Basketball, Karate, Boxing, Cricket namar ba lada phi imsngi ha ki kam sports, ka jingpynshoi ha ki jingdih kan nym lah ban jop ia phi.
U la kitbok ia baroh ar tylli ki team Ka LAWMALI SC bad ka THUNDER FC ba kin ialehkaibha, bad lada don ki team kiba jop , u la ong phim dei ban sngew sarong, bad lada phi rem ruh phim dei ban duh jongkyrmen hynrei phi dei ban ialehkaibha ha kiwei pat ki Tournament.
Kum ka Dak ban plie pyrda ia kane ka Tournament la pynher ia ka Lama jong ka HYC da u Bah Arup Pasah.
Ha kane ka Sngi ka Tournament Committee ka la ioh ruh ban Sam ia ki Memento sah kynmaw, sha baroh ki 32 tylli ki team kiba la wan iashim bynta ha kane ka tournament, ha kaba la iarap pynsam da u dkhot ka Mawlai Sports Club Bah Teibor Dohling.
Ha kane ka jingiakhun ka Thunder FC ka la jop da 3 kol la 2 kol ia ka Lawmali SC. Ia ki Kol na ka Thunder FC la Thep da u players ba phong ia ka Jersey No. 7, 19 bad 15 bad na ka Lawmali SC la thep da u players ba phong ia ka Jersey No 9 & 23.
Ka jingiakhun ha ka match kaba ar kan long hapdeng ka Second chance pyrshah ia ka Boys Noise ka ban long ha ka 20 tarik Jylliew por 1pm bad ka match kaba lai ka Phudmuri pyrshah ia ka Iaipyrshang FC ha ka por 3pm.
Kane ka long katkum ka kyrwoh ba la pyllait da u Sports Secretary Shipai Ialam Nongrem.
