Ka drama ïatan kyrtong na ka bynta ka elekshon MLA kaban long ha u snem 2023 ka la sdang ban shongshit bha mynta ha ka jylla namar ym dei tang ka NPP kaba sdang ban khring briew na kiwei ki party hynrei mynta wat ka UDP kaba donlang ha ka sorkar ka la sdang ban khring lang.
Kaba kham i shongshit ka long ba mynta lei lei ka UDP ka la ïoh ban khring syndon da u MDC ka NPP na Laban Mawprem Bah Mitchel Wankhar uba ha ka sngi Saitjaiñ u la leit ban ïasoh pura bad katei ka party na ka bynta ban ïoh pynkhreh pat na bynta ka elekshon MLA kaban long ha u 2023 na Mylliem constituency.
Kumban shu kdew hangne dang ha kine ki khyndiat bnai ba la dep dei ka NPP kaba sdang nyngkong ban khring ïa u MDC ka Mawlai na ka sem UDP hynrei kane kam shym la shimpor ka ka UDP ban ïoh tan lem kylla na sem jong ka party kaba ki treilang ha ka sorkar synrop MDA. Kumba ka paw mynta hi ka jingïakhun ha ka elekshon ban wan kan dei beit hapdeng ka UDP, NPP khlem da khein troin pat ïa ka Congress bad ka All India Trinamool Congress.
Lada phai pat sha kawei ka Liang kumba kam u President ka UDP Bah Metbah Lyngdoh haduh 9ngut ki MLAna kiwei ki party kin wan ban ïakhun na ka UDP ha u 2023 kata lada ka jingïakren bad ki ka ïaid beit kumba la pynbeit. Lada katei ka jingkam kadei kaba shisha, kamut ha ka elekshon ban wan kin don haduh 18 ngut tang ki MLA kiban ïakhun na ka UDP kata ruh khlem pat khein ïa ki MDC kiba la dep pynïasoh bad kiban sa wan pynïasoh shen
Kane ka lyer elekshon kumba ka long mynta hi imat kan poi beit ka jingïakhun hapdeng ki artylli ki party kiba don mynta ha ka sorkar kata ka NPP bad UDP hynrei kane ka shong pat kano ka party kaba lah ban khring ïa ki kyrtong kiba don jingkyrmen ban jop ym ban shu bun tang ki briew.
Lah ruh ban ong ba ha kane ka elekshon ban wan ki ishu kin treikam borbah bha namar bun ki party khamtam kiba don ha ka Liang Pyrshah kin pyrshang lut ki lad ki lynti ban sei pyrthei ïa ki jingbakla ba kine ki party ba don ha ka sorkar ki la leh. Kane ka elekshon kan sakhi ruh ïa ka jingkam nongkynti ïa kiba bun ki shu ba kane ka sorkar ka trei bad kiban ïa tyngkhuh hi kan dei beit hapdeng ka UDP bad NPP hi.
Ka por hi ka dang sah sa kumba 9 bnai kumta ka dang biang bha wat ïa ka Liang Pyrshah ruh ban pynkhreh ïa ka rukom treikam na bynta katei ka elekshon kaba lah ban pynwandur ne pynshai pat ïa ki paidbah ïa ka nongrim ba ki don.
Haba phai pat sha kiwei ki party i kumba ki khynnah jar jar la ka long naduh ka BJP, PDF lane ka HSPDP kiba donlang ha ka sorkar. Kumba long haduh mynta hi pat don uwei ne kawei ruh ka MDC na kiwei ki party ban wan ïasoh sha ka party jomg ki. Tangba ym lah pat ban tip ïoh ki treikam khlem pynpaw pyrthei bad ki lah ban pynbna ha kano kano ka por ba kin ïakhun na ka party jong ha katei ka elekshon ban wan
