Shillong, Naitung 02: Ka Assam Rifles ka la ïoh ban sdang ïa ka lympung ‘Sentinels Cup 2024’ da kaba plie paidbah ïa ka ha ka 01 tarik mynta u Naitun, 2024, ha ARTC & S, Dimapur.
Ha kane ka jingïalang, kaba thmu ban kyntiew ïa ki kam ïalehkai bad ka jingïadei hapdeng ki shipai bad ka imlang sahlang, la pynitynnad lyngba ka jingpyn-i-nam ïa ki kolshor kiba itynnad, ki jingkren ai mynsiem, bad kiwei kiwei.
La sdang ïa ka jingïalang da ka jingïaid ryntih jong ki kynhun, kawei pa kawei kiba mihkhmat ïa ki jylla bapher bapher jong ka thaiñ shatei lam mihngi. Hadien kane la bud sa ka jingsmai, ka jingpyni nam na ka kynhun shipai, bad ki jingshad tynrai da ki nongrwai na kane ka thaiñ, kiba pyni ïa ka jingriew spah jong ka kolshor ka thaiñ shatei lam mihngi jong ka ri India.
Ha kane ka sngi plie pyrda la ïadon ryngkat UMajor General Manish Kumar, SM, IGAR(N), kum u Kongsan, u ba la plie paidbah ïa kane ka jingïalehkai ‘Assam Rifles Sentinels Cup 2024’.
Haba ai jingkren kum u kongsan, u la ban jur ba ki jingïalehkai ka pynksan ïa ka jingïatylli bad ka wanrah ïa ka jinglong kaba ryntih hapdeng ki riew paidbah kumjuh ruh ïa ki shipai.
U da pynpaw bad kyrmen ba kane ka Sentinels Cup kan long kum ka rynsan ban pyni ïa ka sap ha ka jingialehkai bad ban pynkhlaiñ ïa ka jingïadei hapdeng ka Assam Rifles bad ki riew paidbah.
Ha kane ka Assam Rifles Sentinels Cup 2024 yn ïoh ban sakhi ïa ki kynhun baroh shi taiew kiba ïakhun kawei ïa kawei pat, ha kaba ïa ka phainal yn sa pynlong ha nongbah Shillong.
Ha kane ka kynti ki don haduh phra tylli ki kynhun bapher bapher kiba ïashimbynta, kine ki kynhun ki kynthup ïa ka Arunachal Pradesh (Patkai Warriors), Mizoram (Panthers FC), Meghalaya (Black Dynamite), Nagaland (Viswema FC), Manipur (Vikings FC), DGAR Team, 164 TA (H &H) bad ka 165 TA (H&H).
