Shillong, Naiwieng 25: Hynne ka Sngi Saitjaiñ la ïoh ban sdang pyntyllun shakhmat ïa ka rynsan ïakura kaba la tip da ka 7th Elite Men’s National Boxing Championship hapoh SAI Indoor Hall kaba ha NEHU.
Hynne ka sngi sdang la ïoh ban pyndep haduh 41 tylli ki jingïakhun (bout) na ki 13 tylli ki kyrdan ïalehkai. ïa kane ka lympung kaba la sdang hynne ka 25 tarik Naiwieng ka ban kut ha ka 1 tarik u Nohprah, la pynlong da ka Meghalaya Boxing Association (MBA) bad ka BFI ha ryngkat ka jingkyrshan da ka tnat Sports and Youth Affairs, jong ka Sorkar Jylla bad la plied pyrda da u Secretary General ka Boxing Federation of India (BFI), u Hemanta Kumar Kalita kum u kongsan.
Ha kane ka sngi sdang la ïadon lang u Working President jong ka Meghalaya State Olympic Association, u Bah John F Kharshiing kum u symbud kongsan, bad ruh ka Director jong ka tnat Sports and Youth Affairs ka sorkar jylla, ka Kong Isawanda Laloo IAS, u General Secretary ka MSOA Bah Finely L Pariat, u Assistant Director ka SAI Shillong u PS Chauhan lem bad u President ka Assam Boxing Association u Kamal Goyary.
Kumba la sakhi, ka nongbah Shillong ka la ju pynlong barabor ïa kum kine ki lympung ïalehkai kiba heh ha ki snem kiba la leit kum ka North East Olympic Games 2022, National Ranking Archery Tournament 2023 bad ka Senior National Table Tennis Championship 2022.
Haba ai jingkren ha kane ka sngi, ka Kong Laloo ka la ong ba ka long ka burom ïa ka Jylla hi baroh kawei ban pynlong ïa kum kane ka lympung.
“Ngi sngwkmen eh ba ka BFI bad ka MBA kiba la ïatreilang ban pynlong ïa kane ka lympung ïalehkai. Ha kajuh ka por ka long ka kabu ksiar na ka bynta jong ngi ym tang ban pynlong ïa kane ka lympung bad ban sakhi ruh ïa ki sap ïalehkai jong ki khlur ïakura kiba na kylleng jong ka Ri, hynrei ba ki rangiakura ka Jylla kin ïoh ban pyni ïa la ki sap ki jong ki bad ba kin nangkiew shaphrang ha ka kam ïalehkai.”
“Ki don shibun ki samla kiba donsap ïakura napoh ka Jylla bad mynta ki la nangbun lyngba ka jingtrei shitom ka MBA ha kaba ki la ïoh ban ïashim bynta ha ki zonal bad regional, “ ka la bynrap.
Ka Kong Laloo ka la ai burom sha ki coach kum u Bah Torak Kharpran bad ka Roshni Bhusal, kiba mynta ki long kum ki coach ban ai jinghikai ïa ki nongïakura jong ka ri. Na ka liang ki bor pynïaid ki la ïoh ban pynkup burom ïa kitei arngut ha kane ka sngi plie ïa kane ka lympung.
Shuh shuh ka Director ka la pynpaw ba na ka liang ka Sorkar Jylla lem bad ka BFI ki la soi ïa ka memorandum of understanding (MoU) na ka bynta ban kyntiew ïa ka boxing ha kane ka jylla. Ka la pynpaw ruh shaphang ka Elite Pathway Programme ïa kaba la ïatreilang bad ka MSOA na ka bynta ban ithuh ïa ki sap ïalehkai.
“Nga khmih lynti ba kane ka lympung ka long ka jingïarap ban nangsei ïa ki sap ïalehkai jong ki khynnah. Ki samla ïalehkai jong ngi kin nangïoh mynsiem lyngba kane ka lympung ïalehkai,” la ong ka Kong Laloo da kaba bynrap, “Nga khmih lynti ban ïohi ïa kiba bun ki rangiakura ba kin ïoh rung sha ka Paris Olympics ka ban long ha u snem ban wan.”
U Bah Kharshiing ha ka jingkren ka jong u, u la ong ba lyngba ka jingïoh ban pynlong ïa kum kine ka lympung ka long ka jingïarap ïa ka Jylla ba kan nanglah ban sei shuh shuh ïa ki nongïalehkai ba donsap ha rynsan ïakura ki ban paw hapoh ka ri lem bad kiwei ruh ki jait jingïalehkai.
Ha kawei pat ka liang u Kalita u la ai khublei ïa u Myntri Rangbah ka Sorkar Jylla u Conrad K Sangma lem bad ïa ka Sorkar ka jong u na ka bynta kane ka lympung.
Ha kane ka lympung ki la don haduh 398 ngut ki rangïakura na ki 37 tylli ki jylla, union territory bad kumjuh na ki sports board.
“Kane ka long ka lympung ïalehkai kaba kongsan na ka bynta jong phi. Ki nongjop ki ban khur tang ha kane ka lympung kin ïoh rung sha ki prokram kilanmet jong ka ri bad kito ki rangïakura kiba kynsai kin ïoh ban leit sha Italy na ka bynta ka lympung ïakura knieh rung sha ka Olympic.”
Ha kane ka sngi ki rangïakura ka ri ki la ïoh ban kiew rynsan ha kane ka lympng.
U Banjop Nongkhlaw (51-54kg bantamweight) u la shah rem da ka knockout ha u Mohammed Bilal jong ka Telangana tang ha ka wat kaba nyngkomg, kumjuh u Balnas Sangma u la ïakynduh pyrshah ïa u rangiakura na Goa u Nikhil Gaonkar, ha kaba u la shah rem ha ka 67-71kg light middleweight bout.
Kawei pat ka jingïakhun ka la long hapdeng u Justerwell Jyrwa ha ka middleweight 71-75kg pyrshah ïa u Abhishek Shaw uba na Bengal.
Kane ka lympung ïalehkai kan bteng biang mynta ka sngi U Blei bad yn sdang naduh ka por 11 baje mynstep.
