Shillong, Naiwieng 10 : Ka Khasi Hills Autonomous District Council (KHADC) haduh mynta ka la ïoh ban ai haduh palat 600 tylli ki jingai jingbit ban shna iing ha u pud u sam jong ka Council da kaba bud pyrkhing ïa ki kyndon shna iing ne kata ka building bye-laws.
Katkum ka jingïathuh da u Executive Member ba peit ïa ka building bye-laws, Bah Teibor Pathaw la ïathuh ba ki paidbah mynta ki la bun bha kiba wan ban pan jingbit na ka Council ha shwa ba kin tei iing thymmai.
“Haduh mynta ki la don kumba 814 tylli ki longiing kiba la pan jingbit na ka KHADC ban shna iing thymmai da kaba bud katkum ki kyndon ba la pynkupbor da ka sorkar ha ka district council ban pyntreikam ïa ka building bye-laws ha u pud u sam jong ka Council,” u la ong haba kren bad ki lad pathai khubor.
Katkum ka jingïathuh jong u, ki paidbah haba ki wan ban pan ïa ka jingbit ki hap ban wanrah ruh ïa ki jingdro kiba la pynbiang bad mynjur da ki architect bad engineer,” bynrap shuh shuh u Executive Member.
Nalorkata, u ong ruh ba hadien ba ka Council ka la ïoh pdiang ïa kitei ki jingpan jingbit, ka tnad ka bishar bniah bin pa bin la ki jingdro ba ki paidbah ki wanrah ka biang neem bad hadien ba ki la leit ban jurip ïa kito ki jaka kin sa ai pat ka jingmynjur ba ki lah ban shna noh ïa ki iing jong ki.
“Na ki 814 tylli kiba pan jingbit ngi la dep ban ai haduh 642 tylli katba kiwei pat kiba sah ki dei kiba ki hap ban pynbeit biang ïa ki jingdro bad kiwei pat ki jingdonkam,” u la ong.
Halor ka jingkylli, u ong ba kitei kiba sah kim dei satia ba ka Council ka kyntait hynrei dei kiba dang donkam ban pynbeit kum ïa ki jingdro bad kiwei pat kiban ïahap katkum ki kyndon treikam jong ka building bye-laws.
