Leit jurip u MLA ïa ka surok PMGSY ba 4 klur tyngka na Thynroit, Mawber sha Mawpyrshong

Shillong, Naiwieng 10 : U MLA jongka Mawkynrew Constituency u bah Banteidor Lyngdoh myn ha ka 6 tarik Naiwieng 2024 u la leit jurip ïa ka jingshna ïa ka surok PMGSY naduh Thynroit-Mawber shaduh Mawpyrshong kaba jngai 6 Km bad kaba la mang ban shna pynbha haduh 4.36 klur tyngka.
Ha kane ka jingleit jurip ba la synran lang ruh da ki riew rangbah na katei ka thaiñ, u la ïa kynduh ïa u Kontraktor bad ïakren bad u ba un shna bha ïa ka surok khnang ba kan neh slem ban kan ym tor tang shu wan u slap ha ka por lyiur. Ha ka jingleit jurip u la lap ruh ba ka rukom shna ïa ka surok ka biang bha.
ïa kane ka surok PMGSY la ïoh hadien ba u MLA ula ïai bud dien na ki bor pynïaid ka tnad PWD ban pynrung ïa kane ka surok ha ka skhim PMGSY. Tang shu dep shna ïa kane ka surok, ka la ïarap bha ïa ka leit ka wan ki paidbah bad khamtam ban kit ïa ki mar rep namar katei ka thaiñ ka dei kawei na ki thaiñ kaba im ha ka rep ka riang.
Kane ka jingleit jurip ka pyni ruh ba u bah Banteidor kum u MLA um hun ban shu pynïoh skhim bad ieh ha ki kontraktor ba kin shna hynrei u leit jurip hi da lade ban ïohi ba ka rukom shna kan biang bha khnang ba ki paidbah kin ïoh ïa ka surok kaba bha ban leit ban wan ka ban ïaineh ruh bun bun por.