Sa tang kumba san bnai ei ei ngi la poi sha ka Election MLA 2023 bad ym lap ba ïoh sngew ba kane ka por ka la poi khamtam ha kine ki bnai tlang ka sngi ka lyngkot bha kumta ki paidbah ki la dei ban sdang bishar bad duriap bha ha la marwei marwei shwa ban shim ïa ka rai ïano phin jied ban long u ne ka nongmihkhmat jong phi ha u 2023. La phi dang ibit ban pynneh da u ne ka juh ruh ka shong ha ka mon jongphi ban rai ym don mano mano ba lah ban wan pynbor ïa phi.
Balei ba ong ba dei ban sdang ban bishar bad duriap noh halade marwei marwei khnang ba phi ki paidbah phin ym shah pynthame ha ka bor jongka pisa, ne shah ïalam bakla hangno hangno la ka dei ha ki ïew ki hat, ki jaka ïing iap briew ne ki rynsan ïalap election. Ym lah ban len kata ka jingpyrshah sorkar kan don beit namar bunsien hi wat la ka sorkar ka trei kumno kumno ruh ki paidbah kin ïohi beit tang ïa i jingbakla. Ka long thik kum u nongap kol, lada u lah ban kem 10 tylli ki bol ban lait ka shah thep kol ruh hynrei lada u bakla bad shah thep shikol ruh la kynnoh beit ïa u.
Ym dei ba ïaroh sorkar ne ba beiñ sorkar, hynrei halor ki jingshisha, ym lah ban len kane ka sorkar MDA ka la leh ei ei hi na ka bynta ka jylla khamtam lei lei na ka bynta u pud u sam, Dei tang kane ka sorkar kaba la nud ban leh da ki kam. 50 tylli ki snem kila ïaid kiwei kiwei ki party kiba ïalam ia ka jingsynshar ki shu kut tang ha ka ktien bad jingïadih sha para Myntri Rangbah, ka kam kam poi shano shano ruh, hynrei kane ka sorkar MDA bad ka sorkar BJP na Assam ki la ïatrei lang bad ki la leh da ka kam ban pynbeit ïa u pud u sam. Hooid ym lah ban pynhun lut ïa baroh, namar ka jingïakut ruh ka long ban ïa ai bad ïashim mar kylliang, kumta ka Meghalaya kam lah ban dawa beit naka Assam ban ai lut ïa kat kiba ka kwah bad ka Assam ruh kam lah ban dawa ban shim lut kat ïakiba ka kwah. Donkam ban ïa ai bad ïashim hi mar kylliang.
Ha kane ka jingïaai bad ïashim, kam mut ba la shu ai lut sha ka Assam. Ki paid khappud ki dei ban sngewthuh ba ka Assam ruh ka dei hi ka bynta jongka ri India ym dei ba ka la hap sha ka Bangladesh ne sha kano kano ka ri ruh. Kumta wat la kita ki pud kil a hap sha Assam ka jaka puta bad jinglong trai kan neh hi bad kito kiba la long trai ïaki jaka puta la 50 snem mynta ym don ba lah ban knieh hynrei tang kawei ka long ba ïa ka rejistration pat la hap ban leh noh sha Assam keiñ.
Nalor kata peit kum ka Crowborough bad katei ka hotel ha Jail Road kiba la sahteng da ki phew snem, mynta ki la sdang phyrnai bad shen la ïoh ban plie noh ïaki kiba long ki hotel kiba paw bad heh tam lehse ha kane ka nongbah. Lada phai sha ka jingïakhih ILP ruh kane ka sorkar ka leit bud dien hi man la ka por sha Delhi hynrei ka shong pat ha ki bor na Delhi ban leh pat ïa kaba donkam. Ka jingïakhun ban ïoh pynrung ïa ka ktien Khasi bad Garo ha ka Khyrnit kaba Phra ruh ka dang ïaid ka jingïakren bad kyrmen ba kane kan sa long hi. ïa ki Kharmetor na Them ïew Mawlong ba ym ju nud ba ktah baroh shi katta hynrei kane ka sorkar ka la dep rai ban pynkynriah ïa ki sha ka quarter ba la shna ïa ki hi.
Hooid ym lah pat ban len ki don ruh ki jingshah kynnoh jong kane ka sorkar kum ka kam khaïi dewiong beaiñ, ka kam khaïi masi beaiñ sha Bangladesh bad ter ter. Kine ki dei pat kita ki kam ba la shah kynnoh eh kane ka sorkar. Namar lada kylli na ki nongkhaïi dewiong ne ki bor pulit ruh, ki ai daw ba ki trok dei jong ki High Level, kumjuh ruh wat ki masi ba khaïi tuh sha Bangladesh ruh la kynnoh ba dei jong ki high level. Halor kine ki jingshah kynnoh ka sorkar ka la dei ban thung da ka jingtohkit ban tip kiei kita ki high level. Kumba la kren dang shen da u Symbud Myntri Rangbah ba kiba tip ïa kita ki high level ki dei ban ujor bad sei kyrteng ïaki, hynrei kaba kongsan eh ka long ba ka sorkar ka dei ban thung da ka jingtohkit ba lap kiei kita ki high level khnang ba ki paidbah kin shai bad ban ym shah ïalam bakla khamtam ha ka por election.
