SHILLONG, ïaïong 14: Ka kynhun ki khynnah ïalehkai kriket jong ka Laban Bengalee Boys School ki la ïoh ban khur ïa ka jingjop ha kawei na ki jingïakhun hynne ka sngi Nyngkong jong ka lympung Inter School Under-15 2025, ba la pynïaid da ka Shillong Cricket Association [SCA]. Kane ka jingjop ka la wan hadien ba ka la pynliem ïa ka Ruprekha School da 49 ron.
Hadien ba ka Ruprekha School ka la jop ïa ka jingkynting pisa (toss) ka la aiti sha ka Laban Bengalee School ba kin tied nyngkong, bad kane ka kynhun ka la lah ban kamai 93/7 haki 15 ober. Kiba kongsan ha ka tied ki long u Viraj Kumar Ray (15 ron naki 21 bol) bad u Swarajeet Deb (25 ron naki 23 bol). Ha ka liang ki rangkawang bol, u Subham Mandal u la khur 3/24 naki 3 ober, katba u Aditya Kumar Prasad u la khur 2/13 naki 3 ober.
Hynrei haba pyrshang beh ïa ka thong baroh shiphew ngut ki nongtied jong ka Ruprekha ki la shah pynkhyllem tang na bynta 45 ron naki 11.1 ober bad uba la kamai kham bun ron dei tang u Tanmay Mandal (9 ron naki 15 bol).
U Mayursh Deb u la ïoh ban khur 3/15 naki 3 ober hynrei ka namtam ka long sha u Parthiv Thapa uba la tyngshaiñ da kaba khur 4/9 naki 3 ober kaba la pynthikna ruh ïa u ban khur ïa ka nam ‘Player of The Match.
