SCA Cricket League Super Division: Palat spah ron tied u Mrinal Das ban pynjop ïa ka Langsning

Shillong, Rymphang 14: Ka jingïalehkai jong ka lympung Shillong Cricket League Super Division 2024-25 ba la pynïaid da ka Shillong Cricket League ha madan Polo, hynne ka sngi Thohdieng ka la jam sha kaba kut ha kaba la sakhi ïa ka jingtbit jong u Mrinal Das u la btin lynti ïa ka Langsning CC sha ka jingjop da kaba khyrwit palat ïa ka spah ron ban pynliem ïa ka Donkin scc.
Haba shimti ïa ka pali tied ba nyngkong, u Mrinal Das u la trei borbah da kaba thlieh haduh 128 ron naki 107 tylli ki bol ban pyn kynjoh ïa ka Langsning sha ka 264 ron haduh kaba kut jong ki 42 ober bala mang da kaba hap 7 wiket. U Ibit Thaba u la long uwei pat u rangïalehkai uba la kyrshan da kaba kamai 44 ron naki 39 bol.
Napdeng ki rangkawang bol ka liang pyrshah, u Wallambok u la khur 3/53 naki 9 ober, katba u Gavineal Marpna u la khur 2/42 naki 9 ober.
Haba pyrshang beh ïa ka thong ka Donkin ka la shah pynkut noh da tang 140 ron khlem da lah pyndep pura ïa ka 42 ober ba la mang naba khyllem lut baroh 10 wiket tang haka 26.2 ober. Na ka liang jong u Wallam John Kynshi u la kamai 33 ron naki 32 bol, nangta u Rohit Rai u la tied 24 ron naki 18 bol.
Ha ka liang ki rangkawang bol, u Riboklang u la khur 3/30 naki 5.2 ober, katba u Aaron Nongrum u la khur 2/33 naki 7 ober, kaba la pynthikna ïa ka Langsning ban jop suk da 124 ron. U Mrinal Das uba la khyrwit palat ïa ka spah ron u la ïoh ban khur syndon ïa ka nam Man of The Match.