Shillong, Rymphang 20: Ka spah ron jong u Rahul Shah ka la pynshlur ïa ka Lumpyngad scc ban pynliem da 5 wiket ïa ka Sputnik CC ha kawei na ki jingïalehkai jong ka lympung Shillong Cricket League Super Division 2024-25 ba la pynïaid da ka Shillong Cricket Association ha madan Polo, ha ka sngi Palei.
Ka jingïalehkai ka la sdang ha kaba ka Lumpyngad scc ka la aiti ïa ka Sputnik CC ba kan tied nyngkong ha kaba ka la lah ban kamai 266 ron shuwa ban khyllem baroh 10 wiket naki 44.5 ober. U Rajesh Tati u la kamai 79 ron naki 53 bol, katba u Amiangshu Sen u la kyrshan 50 ron naki 80 bol. Kiba la seisoh ha ka bol na bynta ka Lumpyngad ki long u Abhay Kumar Rai (khur 3/56 naki 9 ober) bad u Nitin Gupta (khur 2/31 naki 9 ober).
Haba jubab, ka Lumpyngad ka la lah ban kynjoh ïa ka thong ba ka donkam tang ha ka 43.1 ober, da kaba kamai 267 ron bad khyllem 5 ngut ki nongtied. Watla na ka liang jong u Rajesh Prashad (khur 2/60 naki 9 ober) bad u Asif Khan (khur 2/49 naki 8.1 ober) ki la lehbha hynrei kim shym la lah satia ban khanglad ïa ka liang pyrshah ban poi sha ka thong.
Napdeng ki nongtied jong ka Lumpyngad u Samir Shah u la lah ban kamai 63 ron naki 73 bol, hynrei ka jingïaroh ka long sha u Rahul Shah uba la khur syndon ïa ka khusnam Player of The Match, da kaba khyrwit 105 ron naki 66 bol. Ha kaba kut ka Lumpyngad ka la jop da 5 wiket.
